Tur avion Boeing 737-8 Max prohibi di drenta nos espacio aereo

Basa riba dos accidente fatal den un periodo di 5 luna cu avionnan tipo Boeing 737-8 MAX, diferente autoridad di Aviacion Civil a dicidi di “ground” e tipo di avionnan aki. Esaki ta inclui autoridadnan di paisnan manera Australia, Singapore, Malaysia y tur paisnan den Union Europeo (32 pais).

Den consulta y coordinacion entre e paisnan den Reino Hulandes, a dicidi pa implementa e mesun precaucionnan aki tambe pa e parti Caribense den Reino, teniendo na cuenta e seguridad di e pasaheronan di avion. Cu esaki, a tuma e decision temporario di prohibi operacionan cu avion tipo Boeing 737-8 MAX y Boeing 737-9 MAX.

E decision aki ta uno di precaucion y di indole temporario. Lo adapta of revoca e precaucion aki asina cu haya indicacionnan concreto di causa di e accidentenan ariba menciona, y ora wordo determina cu e posibel risiconan a keda mitiga door di accionnan corectivo cu lo por ta necesario.

E Boeing 737-8/9 “MAX” ta un tipo di avion relativamente nobo y no ta wordo uza hopi pa vuelonan pa Aruba.

Ministerio di Transporte, conhuntamente cu Ministerio di Turismo, ta monitoriando e asunto aki di hopi cerca y cu cooperacion di aereolinianan ta trata di minimalisa e efecto(nan), si tin algun, pa Aruba.

Comments

comments