Belgica no tabata kier mas sorpresa dentro di un mundial, cu resultadonan inespera y a pone tera mei mei di nan cu Tunisia for di e prome lansamentonan, di momento cu Hazard a mik cu e pena maximo den e prome 5 minuutnan di wega.
E Noord Africanonan, condiciona pa e resultado adverso, a delanta den linea, provocando cu e Belganan a bay den contraatakenan rapido, lidera pa Lukaku, kende tambe ta e autor di e di dos tanto.
E cabesaso di Bronn den e di 18 minuut a hisa e punto di mas halto di locura di e partido cu 2-1 riba e scoreboard. Pero e speransanan di e Tunecinonan, kendenan a pone presion den porta di gol di Cuortois, a desvanece completamente cu e doblete di Lukaku, net prome cu half-time.
E “diabelnan cora” e biaha aki bisti na geel, a move manera cu nan tabat kier, dura e di dos mita di e partido. Hazard tabata e autor di un otro gol, den un mano a mano cu el a sa di saca probecha di dje. Un di e ekiponan mas atractivo di Mundial y por lo tanto un candidato pa derecho propio na cualkier meta den e torneo aki. Pa awo, ya nan tin un pia y mey den e octavonan di final y ta mustra di ta un di e faboritonan den e ultimo campeonatonan.
Cu e resultado aki, e ‘diablo coranan’ ta yega 6 punto y nan ta sigura nan clasificacion. Y Tunisia lo keda pafo di e torneo, den caso cu Inglatera gana di Panama den e encuentro cu lo mester tuma luga diadomingo. Belgica falta un wega mas pa hunga, cual lo ta contra Inglatera.