Pa por proteha bo mes di e sangura cu ta transmiti e.o Dengue, ta nesesario pa nos conoce e sangura aki miho, sa kico e ta gusta, kico e no ta gusta, unda e ta frecuenta y con eta biba.
Ta conosi cu e sangura Aedes Aegypti cu ta transmiti e.o Dengue ta mas activo den oranan di mainta trempan y atardi pa anochi, e sangura no ta gusta mucho claridad. P’esey paden e sangura aki por ser incontra scondi den espacionan scur manera den cashi of bou mesa y stoel. Pafo nan ta sconde cualkier caminda unda tin menos claridad posibel. Durante dia e sangura aki no ta pica cu frecuencia cu exepcion si bo bay unda nan ta scondi, of si bo camber ta tiki scur. Mayoria biaha e sangura ta sali for di su escondite ora ta birando scurito pa e por alimenta su mes. E sangura macho den mayoria caso ta alimenta su mes di nectar di mata of fruta, e sangura muhe si ta pica hende pa e por alimenta su mes cu sanger. E sangura muhe mester di sanger pa e por pone su webonan.
Sabiendo esaki cada ciudadano individualmente por tuma e accionan nesesario pa proteha nan mes miho contra e sangura aki cu por ocaciona Dengue of otro malesanan transmiti pa sangura, door di:
Bista paña cu man y pia largo durante oranan di atardi pa anochi
Durante dia, inspecciona areanan scur bon pa sangura
Uza repelente contra sangura riba cuero cu no ta cubri cu paña
Den especio pafo di cas cende mecha of uza bela contra sangura
Sera porta y bentana di cas prome cu bira scur of uza screen na porta y bentana
Evita di bishita areanan unda bo ta conciente cu tin hopi sangura
Spuit paden di cas, camber, oficina y areanan cu bo ta frecuenta regularmente cu producto pa mata sangura.
Pone baby y mucha chikito drumi bou mosketero
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]