Internacional: Negociadornan cu ta trahando pa caba cu e guera Rusia-Ucrania a papia caba di “dividi cierto activonan,” presidente di Merca Donald Trump a bisa diadomingo ora el a anuncia cu e tin plania pa papia cu su homologo Ruzo Vladimir Putin diamars.
E comentarionan di Trump ta bini despues cu el a anuncia siman pasa cu Ucrania a acepta un paro di fuego di 30 dia propone pa Merca, poniendo e bala den corte di Rusia si e lo acepta su proposicion pa caba e guera rapidamente.
“Nos ta haciendo basta bon, mi ta kere, cu Rusia. Nos lo wak si nos tin algo di anuncia kisas pa diamars, lo mi papia cu presidente Putin,” el a bisa periodistanan abordo di Air Force One durante un vuelo bek pa Cas Blanko despues di su weekend na Mar-a-Lago.
“Hopi trabou a wordo hací durante fin di siman, nos ke wak si nos por trece e guera ey na un fin,” el a bisa. “Kisas nos por, kisas nos no por, pero mi ta kere cu nos tin un hopi bon chens.”
Trump a bisa cu e negociadonan a señala cierto topiconan caba pa discusion.
“Nos lo ta papiando di tereno. Hopi tereno ta hopi diferente cu e tabata prome cu guera, manera bo sa. Nos lo ta papiando di tereno, nos lo ta papiando di plantanan di coriente, esei ta un pregunta grandi,” el a agrega.
Putin “ta acepta e filosofia di presidente Trump” den ke mira e guera yega na su fin, Witkoff a bisa. El a describi su reunion siman pasa cu Putin como un “discusion basa riba solucion,” y a expresa confiansa cu un pauza den bringamento por yega denter di simannan.
Putin tambe a bisa diabierna cu su pais ta trahando pa restora relacionnan cu Merca, despues cu nan a wordo “practicamente reduci na sero, destrui pa e administracion mericano anterior.”
“En general, e situacion ta cuminsa move,” el a bisa, referiendo na e relacionnan cu e administracion di Trump. “Ban wak kico ta sali for di esaki.”
