E lider Norcoreano, Kim Jong-un, y e president di Merca, Donald Trump, a disfruta di un cena hunto na Hanoi (Vietnam) den un ambiente intimo y relaha na comienso di nan di dos cumbre.
E cumbre a cuminsa diaranson na Hanoi, Vietman y ta destina na sigui reforsa lasonan y impulsa un dialogo tocante desnuclearisacion. Ambos a sinta banda di otro, no dilanti di otro, manera den nan prome cumbre na Singapur, rond di un mesa chikito rondo prepara pa nan y nan compañantenan den e Hotel Metropole den e capital Vietnamita.
Hunto cu nan a sinta tambe nan respectivo tolknan y e cuater conseheronan cu a participa den e cena.
E dos mandatarionan a cuminsa nan di dos cumbre cu’n conferencia di prensa cortico di casi 20 minuut unda cu nan a mustra optimista pa cu e resultadonan di e reunion aki, cu ta wordo celebra ocho luna despues di nan prome encuentro na Singapur, unda cu ambos pais a acroda di traha hunto pa e desnuclearisacion di Noor- Korea.
Ta spera cu e cumbre aki logra miho resultadonan, cu casi no a mustra di ta avansa debi na e ausencia di palabracionnan concreto.
Cas Blanco a prohibi varios periodista na accede e comienso di e cena entre Trump y Jong-un despues di cu e mesun reporteronan aki a haci pregunanan na e mandatario Mericano na comienso di e cumbre na Hanoi.
Un grupo di 13 coresponsal di Cas Blanco tabata tin autorisacion pa sigui Trump henter dia y drenta na tur su actonan cu cobertura mediatico. Pero al menos 3 di nan a keda pafo di e ultimo acto, na comienso di e cena entre Trump y Kim Jong-un den e prome actividad di e di dos cumbre.
“Sarah Sander (vocero di Cas Blanco) a informa nos un rato pasa cu nan no tabata bay laga niun periodista di un medio impreso drenta debi na temanan sensibel relaciona cu preguntanan cu a lansa na gritamento den e otro actonan” di e cumbre, Vivian Salama, periodista di Wall Street Journal, a bisa.