ATLANTIC CITY, New Jersey – Donald Trump a yam’e e di ocho maraviya di mundo. Awo e ta solamente otro casino fracasa di Atlantic City.
Trump Taj Mahal finalmente a cera su portanan husto prome cu 6’or di mainta dialuna.
E ultimo huespednan di e hotel a sali diadomingo y algun di e ultimo gamblernan di e casino tabata cambiando nan ficha mientras e candidato tabata debati cu Hillary Clinton, enfrentando cada biaha probabilidadnan mas abao.
E propio Trump no ta doño di nada mas sino e nomber di e grandioso minaretnan di neon di Taj Mahal. Den e ultimo dianan, e casino tabata controla pa e empresario Carl Icahn.
Icahn a bisa cu tabata un “dia tristo pa Atlantic City” y pa e 3000 trahadonan di e casino, pero el a bisa cu e no por a logra un acuerdo cu e sindicato di trahadonan di e casino y no por sigui maneha sin tin perdidanan grandi.
E sindicato, cu ta representa mas of menos 1000 trahado di Taj Mahal, a logra trato cu otro cuater casino den e ciudad net prome cu e fin di siman di Dia di Independencia, incluyendo un otro casino cu ta propiedad di Icahn.
Pero e trahadonan di Taj a declara un welga dia 1 di Juli.
“Apesar di nos miho esfuersonan, cu ta inclui perde te cu 350 miyon di dollar den poco aña, nos no tabata por a salba Taj Mahal,” Icahn a bisa den un comunicado dialuna.
Trump Taj Mahal tabata den problema durante varios aña, hunto cu e resto di e casinonan cu fondonan limita di Atlantic City, unda cu cinco di nan a cera desde 2014, incluyendo Trump Plaza. Di e shetenan cu ta keda dos, Bally’s y Caesar, a presenta un solicitud di proteccion di bancarota.
Taj Mahal a habri su portanan na April di 1990 y tabata tin problemanan financiero casi inmediatamente, segun un analisis cu CNN a haci di documentonan presenta dilanti autoridadnan estatal di wega. (Gaming Board)
Trump a financia e casino cu bononan di sushi y no por a cubri e pagonan cu ganashi di operacion di wega. Den cuatro di e prome 16 dianan di operacion di e csino aki, su cuentanan bancario tabata contene menos di 0 dollar, cu deficitnan te hasta di 1.7 miyon di dollar, segun un reporte di 1990 di e Division di Leynan di WEga.
E estado a aproba un auxilio financiero di 65 miyon di dollar na 1990 pasobra nan tabata tin miedo cu si cera e casino, por afecta e economia di Atlantic City. Taj a declara bancarota e aña siguiente, haciendo pa nan deshaci di cientos di miyones di dollar den debe. Esey tabata e prome di e cuater biahanan a corte di bancarota pa e operacionnan di e casino Trump.
Ainda despues di e reorganisacion, Taj a sigui lucha pa paga su debenan, reportando perdidanan neto di 121 miyon di dollar entre 1992 y 1995, segun documentonan di e compania SEC, e agencia di Merca cu ta encarga di regula e industria di balor. E empresa tabata tin un beneficio operativo durante cuater aña, pero a caba den cifranan cora debi na e pagonan di interes.
Taj Mahal a wordo inclui den documentonan di bancarota na 2004 y un biaha mas na 2009. Trump a laga su posicion como director ehecutivo na 2004. E magnate a laga e casino durante e reorganisacion di 2009 pero a sigui prestando su nomber na Trump Entertainment Resort, e compania cu tabata maneha Taj Mahal y Trump Plaza.
Y Trump, e homber, eventualmente a demanda Trump, e compania, pa trata di kita su nomber di e casinonan, pues el a bisa cu su demanda di Taj y Trump Plaza a cay den un “estado di abandono total” y no tabata digno di su “reputacion superior.”
“Nos tin un standard hopi halto,” Trump a bisa CNNMoney na 2014. “Y nan no tin’e.”
Fuente: CNNMoney