Washington, D.C., MERCA- Merca a lansa un atake militar contra blanconan di gobierno Sirio. Esaki como represalia contra di e atake cu armanan kimico contra di civilnan e siman aki, segun anuncia pa gobierno di Merca diahuebs.
Bou di orden di Presidente Trump, barconan di guera Mericano a lansa 50 misil di crucero Tomahawk.
E atake a wordo lansa contra di e base aereo di Shayrat, for di cual posiblemente e avionnan Sirio cu a tira e bombnan kimico a sali, segun un funcionario di Defensa di Merca.
Anteriormente, Presidente Trump a bisa cu algo mester pasa relaciona cu e lider Sirio Bashar Al Assad despues di e atakenan kimico di e siman aki. Funcionarionan Mericano ta responsabilisa Presidente Assad pa esaki.
“Na mi parecer loke Assad a haci ta teribel, mi ta kere cu loke a pasa na Siria ta un di e crimennan berdaderamente horibel, algo asina nunca mester a pasa”, Trump a declara na periodistanan a bordo di e avion presidencial Air Force One. “Loke a pasa na Siria ta un berguensa pa humanidad; e ta na poder, y mi ta kere cu e ta esun cu ta duna ordo pa cosnan pasa, asina ta algo mester a wordo haci”.
Ya caba Trump a informa miembronan di Congreso cu e tabata considerando e posibilidad di un accion militar na Siria den represalia pa e atake kimico di e siman aki, y e ta reconoce e gravedad di e situacion.
Diaranson Trump a yama e atakenan kimico cu a mata mas di 70 persona na Siria como un acto “repugnante” cu a cambia su opinion tocante e presidente Sirio Bashar al Assad.
“E atakenan kimico di ayera, un atake kimico horibel na Siria contra personana inocente, incluyendo muhe, muchanan chikito, incluyendo babynan bunita, nan morto tabata un ofensa contra di humanidad”, segun declaracion di Trump den e hardin di rosa di White House, hunto cu rey Abdullah di Jordania.