WASHINGTON, D.C., Merca- Presidente Mericano Donald Trump a declara guerra na e pandiyanan Centroamericano na Merca. El a intensifica, den su prome 100 dianan di mandato, esfuersonan pa deporta nan miembronan.
Segun gobierno Mericano, e gangnan of Mareronan, ta “criminalnan” cu ta representa un desafio serio na e siguridad nacional.
Trump ta culpa e gobierno di Barack Obama di a permiti e formacion di gangnan den varios ciudad Mericano.
Segun e oficina di e fiscal di Massachusetts, MS-13 ta un di organisacionnan criminal mas grandi na e pais y e tin 30 mil miembro operando internacionalmente, mayoria di nan na El Salvador, Honduras y Guatemala.
Contrario na loke hopi ta kere, e gang Mara Salvatrucha, e pandiya mas grandi y reconoci a nace den decadanan di 1980 den e ciudad di Los Angeles (Merca) y no na Centro- America.
MS-13, manera nan ta conoci, a wordo funda door di grupo di inmigrantenan Salvadoreño cu a huy di e guerra civil na nan pais. Awendia, entre su miembronan tin tambe inmigrantenan di Mexico, Honduras, Guatemala y otro paisnan Centroamericano y tambe Suramericano, segun un informe di FBI riba e evaluacion di amenasa di e gang aki.
E gang Barrio 18, un otro gang grandi Suramericano, tambe a nace den e cayanan di Los Angeles na final di añanan 70, riba iniciativa di grupo di migrantenan cu a scapa di e guerra civil Salvadoreño.
E prome obhetivo di e gangnan aki tabata pa defende nan mes di e violencia di gruponan racista Mericano y di gangnan Mexicano. Ora cu nan a cuminsa haya poder, nan a busca manera pa establece nan mes como un autoridad nobo den e zona y nan a expande nan tentaculonan na otro ciudadnan Mericano y pa Centro – America.
Fuente: cnnenespanol