WASHINGTON D.C., Merca – Companianan cu bandona Merca en busca di costonan menor na otro pais lo enfrenta “consecuencia”, e proximo presidente di Merca, Donald Trump, a menasa diahuebs, kende tambe a ofrece corta cu belasting y regulacionnan empresarial.
“E companianan no ta bay bandona Merca sin consecuencia. E no lo bay pasa,” Trump a bisa durante un bishita na fabria di aparatonan di aire acondiciona Carrier na Indiana, cu a renuncia na relocalisa 1000 luga di trabao na Mexico.
Den su propuesta pa retene e huida di empresanan, Trump a priminti na reduci impuesto y corta cu regulacionnan cu ta “aplasta” industria y negoshinan chikito.
“Su impuestonan lo ta mas abao y su regulacionnan inecesario lo disparce. Nos tin mester di regulacionnan pa siguridad y ambiente. Pero mayoria di e regulacionnan no tin sentido,” e magnate Republicano a bisa.
Ora di resalta cu seis di e ocho companianan Mericano di airco ta reubica na Mexico, Trump a insisti: “Nos no lo bay tolera esaki mas.”
“Nos gusta Mexico. Mi tabata tey tres luna pasa cu e presidente di Mexico, un tremendo tipo, pero nos mester tin un trato husto. Nos no ta ricibi nada,” el a afirma, reiterando su criticanan di campaña contra e tratado di liber comercio di Norte America (TLCAN).
“Nos tin TLCAN, cu ta un desaster total,” el a afirma.
Trump tambe a reitera su promesa di construi un muraya na e frontera cu Mexico. “Keremi, nos ta bay construi e muraya ey,” el a señala.
Fuente: RCN Noticias