MEXICO CITY, Mexico – Donald Trump a confirma via Twitter cu a acepta e invitacion di Enrique Peña Nieto pa bishita Mexico y reuni cu e mandatario.
E presidente Peña Nieto tambe a confirma e reunion riba su cuenta di Twitter.
Diaranson Trump tin programa pronuncia un discurso riba su politica di imigracion na Arizona.
Un aña pasa, ora cu el a lansa su campaña, Trump a bisa: “Ora cu Mexico a manda su hendenan, nan no ta manda e mihonan…. Nan ta trece droga, trece crimen y nan ta violado.”
Desde e tempo ey a manifesta un posicion fuerte riba imigracion y un di su metanan tabata pa traha un muraya na e frontera cu Mexico pa impedi e paso di imigrantenan ilegal.
Ademas, a lo largo di e campaña a manifesta cu su intencion ta pa deporte e 11 miyon di imigrantenan indocumenta.
Na e momento aki, e opinion publico na Mexico ta enfoca na honra e cantante Juan Gabriel, kende a muri diadomingo na California.
Nos ta cambia di posicion?
Siman pasa, Trump a sugeri cu e lo permiti excepcionnan pa cu algun imigrante indocumenta pa keda na Merca, primintiendo cu no lo duna nan e ciudadania pero declarando na Fox News cu “no tin amnistia, pero nos ta trahando cu nan.”
Pa Trump, cu su yegada na e nominacion Republicano tabata basa den gran parti den su politicanan imigratorio di liña duro, e comentarionan ta un di e señalnan mas cla te cu e fecha cu e ta reconsiderando su propuesta di deporta tur e 11 miyon di indocumentadonan cu ta biba na Merca, un parti clave di su plataforma di campaña.
“No tin ciudadania. Lagami duna un paso mas leu: nan lo paga belasting, nan tin cu paga belasting. No tin amnistia, como tal, no tin amnistia, pero nos lo traha cu nan,” Trump a bisa Sean Hannity ora cu a puntre si e lo permiti excepcion.
El a sigui: “Awo, nos tur ta concorda caminda cu nos tin cu saca e malonan. Pero ora (…) mi a reuni cu miles y miles di persona cu respecto e tema aki, mi a haya personanan hopi fuerte cu a bin cerca mi, realmente hende grandioso cu ta bin y a bisami: “Señor Trump, mi stimabo, pero tuma un persona cu tabata aki pa 15 of 20 aña y sak’e hunto cu su famia, ta hopi duro, sr. Trump,” tur esaki ta pasa cumi, ta algo hopi hopi fuerte.”
Fuente: CNN en Español