WASHINGTON, D.C., Merca- Presidente Donald Trump a pidi na ex- director di FBI James Comey pa el a para e investigacion relaciona cu e vinculonan di e ex- consehero di siguridad nacional di White House Michael Flynn y Rusia. Esaki segun un colaborador di Comey cu a bisa di a wak un memorandum.
E colaborador a declara na Reuterus cu e detayenan di e documento, raporta inicialmente den New York Times, tabata hopi exacto.
“Mi ta spera cu bo por laga esaki pasa”, Trump a bisa na Comey, segun e redaccion di e memorandum, confirma pa e fuente.
White House a nenga e reporte aki den un comunicado entrega na periodistanan, afirmando cu e no ta “un descripcion veridico ni preciso di e combersacion entre e presidente y e Comey”.
E memorandum a wordo scirbi door di Comey inmediatamente despues di su reunion cu Trump den e Oficina Oval di White House, e dia despues cu Flynn a renuncia na su cargo door di su contactonan cu e Rusonan.
E renuncia di Flynn a bin oranan despues di cu e informacion di Departamento di Husticia, unda cu algun simannan prome a adverti WHite House cu Flynn lo ta vulnerabel pa chantahe door di su contactonan cu e embahador Ruso, Sergei Kislyak, prome cu Trump a asumi poder dia 20 di Januari.
Un vocero di Federal Bureau of Investigations (FBI) a nenga di duna comentario riba e detayenan di e memorandum.
Fuente: www.reuters.com