WASHINGTON D.C., Merca – E presidente Donald Trump, a afirma awe cu e ta dispuesto na reuni cu e lider Noord Koreano, Kim Jong-un, “bao di e circunstancianan adecuado,” mey mey di e escalada di tension cu Pyongyang pa su pruebanan reitera di misil y su programa nuclear.
“Si e tuma luga, claro, bao di e circunstancianan adecuado. Mi lo hacie,” Trump a indica riba un reunion cu Kim den un entrevista cu Bloomberg, un dia despues di reconoce cu no ta exclui e opcion militar ante e provocacionnan continuo di e regimen Noord Koreano.
E mandatario a bisa di ta “honra’ di reuni cu e lider Noord Koreano.
“Hopi politico no lo bisa esey nunca, pero mi ta bisando esaki cu bao di e circunstancianan adecua, mi lo reuni cun’e. Nos tin noticianan di ultima ora,” el a subraya.
E tensionnan escala riba e peninsula Koreano a converti den un di e principal menasanan den materia di siguridad pa Trump, kende a cumpli 100 dia como presidente diasabra cu a pasa.
Den e ultimo dianan, e mandatario a insisti cu e ta prefera un solucion diplomatico cu Pyongyang y a expresa su confianza den e mediacion di e presidente Chines, Xi Jinping, pa calma e tensionnan.
E palabranan di Trump a tuma luga despues cu e regimen Noord Koreano a sigura awe cu e lo impulsa “riba un velocidad maximo” su programa nuclear, como respuesta na e creciente presion eherci riba e pais di parti di Washington.
E ultimo encuentro di un alto cargo Mericano cu e regimen comunista di Pyongyang a tuma luga na 2000, ora cu e tempo ey, e secretaria di Estado, Madeleine Albright, bao di e Gobierno di Bill Clinton, a reuni den e capital Noord Koreano cu Kim Jong II, e tata di Kim, pa discuti e programa nuclear.
Fuente: EFE News