PALM BEACH (FLA), Merca- Presidente Mericano, Donald Trump a duna permiso na ehercito pa uza “forsa letal” na e frontera cu Mexico, “den caso cu ta necesario”, cu e obhetivo di controla e migrantenan Centroamericano.
El a menasa tambe di cera pa un tempo indefini e frontera di Merca cu Mexico, cual lo afecta e comercio entre ambos pais.
Ademas, e mandatario Mericano a informa di cu e lo por tin un “shutdown di su gobierno”, otro luna debi na e siguridad na e frontera. Cu esaki, e lo paralisa bon parti di su actividad administratito di gobierno Mericano, cu e meta di atende cu loke Trump ta considera un crisis di siguridad na frontera.
E declaracionann di e presidente Mericano ta bin apenas un dia despues di cu e secretario di Defensa di Merca, Jim Mattis, a bisa cu el a haya autoridad pa permiti e tropanan tin mas poder pa yuda na proteha e funcionarionan na frontera.
Rond di 5800 soldaat den servicio activo a wordo manda pa e frontera di Merca y Mexico pa reforsa e siguridad prome cu e yegada di e caravana di migrantenan, compone principalmente di Hondureñonan.
Actualmente un grupo di mas di 6 mil migrante Centroamericano ta na Tijuana, Mexico cu e obhetivo di tramita e solicitud di asilo na Merca.
E marca di caravana migrante procedente di Centroamerica ta e motibo cu Trump a uza pa duna ordo na Ehercito pa bay na e frontera cu Mexico y yuda e Border Patrol.
Cera frontera
Trump a bisa cu na Tijuana tin “un situacion hopi malo” na Tijuana unda cu e grupo mas grandi di Centroamericanonan ta ubica, cual ta forma parti di e caravana di migrante.
“Si nos wak cu e situacion bay for di control, nos lo cera e entrada di e pais pa un periodo di tempo te ora cu nos logra controla full e frontera. E frontera completo”, Trump a sigura na periodistanan, na Palm Beach, Florida.
Confrontacion cu Poder Hudicial
Horanan prome, Trump a responde na e presidente di Tribunal Supremo Mericano, John Roberts, cu a critica e mandatario pa ataca e independencia di e Poder Hudicial ora e la blokia algun medidanan imponi den materia migratorio.