Pa basta tempo caba, tin un discusion si airport lo mester tin su propio cuerpo di bombero, pa cual Sr. James Fazio, director di Aruba Airport Authority ta amplia mas ariba esaki.
Esaki segun Sr. Fazio no tin sentido economico. Un cuerpo di bombero tin gastonan fiho pa asina mantene su mes ariba un nivel di siguridad internacionalmente, cual ta encera trainingnan, gasto di uniform, etc. E lo ta algo cu lo no tin ningun sentido pa airport tin su mesun cuerpo di bombero, di punto di bista financiero. Airport ta trahando ariba un manera pa ta un miho apoyo pa Cuerpo di Bombero, awo tin un solo Cuerpo di Bombero, cual ta miho sistema economicamente.
Pa por ricibi avionnan grandi, bo mester tin un sistema di siguridad optimal. Na nivel di siguridad internacional, Aruba su airport ta na un nivel 9, pa cual nos por ricibi avionnan grandi manera KLM. Esaki ta crea un tremendo ambiente di confiansa pa e sistema di bombero. Ta bon pa tene na cuenta e motibo pa cual e bomberonan ta na airport y esaki ta pa den caso di emergencia, scapa bida di hende. Den un caso extremo asina, cada seconde ta conta. P’esey e truck nobo ta capas di paga candela den un corto tempo, den caso di un accidente aereo.
E truck cu Bombero a haya recientemente, ta cumpli cu e reglanan internacional y ta un tiki excesivo, pero un ta pa back up y e otro lo drenta den servicio. Pero e trucknan di Bombero ta cla pa cualkier eventualidad, segun Sr. James Fazier, director di Aruba Airport Authority.