Diamars un truck di gasolin (conoci como cisterna) a explota den e tunnel Quebrada Blanca, riba e caminda cu ta comunica e capital Colombiano di Bogota, cu e ciudad di Villavicencio, causando un candela grandi cu a dura varios ora, e medionan local a informa.
E explosion a tuma luga algun seconde despues cu e chauffeur di truck a perde control di e vehiculo den un birada y a bolter. Algun testigo di e accidente ta confirma cu e chauffeur a grita prome cu su brakenan tabata fayando y a purba di maniobra entre e autonan. E video publica riba red social, ta mustra momento di e accidente y e explosion violento, na momento cu por a mira con algun auto a logra para dilanti di e vehiculo na vlam y no a ricibi daño di candela.
Algun minuut despues, e bomberonan di e departamento di Cundinamarca a yega n’e luga y durante dos ora nan por a anuncia cu nan a logra paga e candela. Sinembargo, e tunnel a resulta seriamente daña. Di su parti, e secretario di Mobilidad di Cundinamarca, Jorge Godoy, a anuncia cu e lo keda cera pa por lo menos tres luna debi n’e dañonan.
Fuera di esey, e conductor di e truck a sobrevivi e accidente y hiba n’e clinica Primavera na Villavicencio cu kima di 84% di su curpa. Despues cu a stabilis’e y ricibi prome auxilio, a hib’e na un centro di asistencia di Bogota, caminda cu e ta sigui ricibi cuido special.