Algo prome cu 6’or di mainta un automobilista a topa cu un accident na Solito y mesora a bati alarma. Segun el a mira, ta cu un truck di sushi a primi un empleado contra palo di luz.
Dos patruya a yega hopi lihe na e sitio y en berdad a topa cu un trahado na suela den un pida mondi. E trahado tabata keha di dolor na su pia.
Polis a pidi ambulance pa yega lihe ya cu awa tabata cay y e palo di luz tabata di banda. Nan tabatin miedo cu e palo di luz por cay.
Personal di ambulance na nan yegada a corta carson di e empleado pa mira unda e lesion ta y despues a pone un aparato special bou di e herido pa evita cu e ta move y causa mas lesion na su curpa. Por a mira con polisnan a coopera cu chapi pa haci limpi rond di e area unda cu e herido a keda na suela.
Den mas o menos 15 minuut a stabilisa y transporta e herido pa hospital.
Con e accident por a sosode no ta conoci, ya cu polisnan mester papia cu e chauffeur di e truck ainda, kende tabata den un susto.