MEDELLIN, Colombia – Tres persona, un tata y su dos yiunan menor di edad, a wordo asesina den madruga di diadomingo, dentro di un apartment den e sector di Nuevo Occidente di e capital Antioqueño.
E coronel Jose Contreras, comandante operativo di Polis Metropolitano, a dincia cu e prome hipotesis ta apunta cu e pelea entre famia of amigonan lo a desencadena den e tripel homicidio cu a sosode den e urbanisacion Nazareth, dado cu den e luga di e hechonan lo a bay tin un fiesta.
E cadavernan ta coresponde na un homber di 39 aña, un hoben di 16 y un mucha homber di mas of menos 8 aña. Tur a muri pa motibo di heridanan cu arma blanco.
E mayor di edad a wordo identifica como Conrado Calle Ocampo y tabata traha den construccion.
Ademas a trascende cu e menornan di edad, cu tabata bayendo den cuarto y octavo grado respectivamente. Nan tabata biba cu nan mama den e bario Villatina y nan tabata di bishita e fin di siman aki cerca nan tata.
Na e luga di e hechonan, di acuerdo cu e rapport di autoridadnan policial, tabata tin boternan di licor y rastronan di cocaina y marihuana.
Testigonan di e hecho a confirma na El Colombiano, cu den e luga efectivamente lo tabata tin un paranda y a bisa cu e hechonan a sosode pa 4’or di mainta.
Un ruman di criansa di e victimanan, cu a participa den esaki, lo tabata tin relacion cu e crimen, a sorprende e bisiñanan di e sector di San Cristobal.
Fuente: El Colombiano