TripAdvisor a premia ABC Tours den e top 10 mihor actividad den Caribe

TripAdvisor pa medio di e “Travelers Choice Awards”, a reconoce recientemente e top experiencianan mas busca como tambe e reservacionnan mas gusta globalmente.
E ganadornan ta wordo determina a traves di un algorithm cu ta tuma den consideracion tur e ‘business reviews’, opinionnan y popularidad entre e bishitantenan den e ultimo aña.
E aña aki, Aruba a wordo selecta cu e asina yama ‘Island Ultimate Jeep Safari’ di e compania local ABC Tours, den e di tres lugar ariba e lista di ‘Top 10 Caribbean Experiences’, net banda di Bahamas na di dos lugar y Republica Dominicana cu a sali na prome lugar.

Esaki ta refleha tambe cu Aruba su atraccionnan natural no ta cuminsa y caba na beach. E bishitantenan ta ansioso pa conoce e recursonan natural manera cu nan yega na e isla.
Ta un experiencia cu solamente nan por biba aki na Aruba, unda por ehempel por pasa tempo cu famia na Natural Pool ‘Conchi’, Ayo Rock Formation, Kapel di Alto Vista y hopi mas, mientras nan ta disfruta di un dushi lunch. ‘Island Ultimate Jeep Safari’ ta ofrece tambe ‘snorkeling gear’ pa esnan cu kier pasa un rato den e awanan blauw di Aruba.
Marvin Kelly, Propietario di ABC Tours ta expresa di ta masha contento cu e reconocimento aki. Como empresario local, trahando pa mas di 20 aña den e mundo turistico, e ta haya cu e reconocimento cu nan a haya aworaki ta un empuhe y un motivacion grandi pa nan empresa den su totalidad.

“E ta bunita toch cu nos por a pone Aruba bek ariba e mapa caminda cu aki na Aruba tin dos top actividad cu a wordo reconoci den henter Caribe y caminda cu nos tin e posicion number 3 y number 5 den e 10 mihor actividadnan den Caribe”, a manifesta.
TripAdvisor ta tene na cuenta e feedback cu nan ta haya di e miyones di usuarionan relaciona cu e mihor experiencianan na mundo. Nan ta na analiza e ‘reviews” y a base di esey nan ta scoge loke nan ta considera e top actividadnan.
“Mi ta contento cu nos a wordo reconoci como un di e 10 mihornan den full Caribe y vooral den e mihor 10 unda bo tin dos actividad di ABC Tours. Mi ta kere esaki ta bisa hopi pasobra nan ta ripara cu mas y mas nos ta pone akinan hopi entasis, no solamente ariba e satisfaccion cu ta algo clave, pero nos ta wak e experiencia den su totalidad. Y nos kier ‘make sure’ pa e cliente ta educa pa compronde e parti siguridad y di cuido di e medio ambiente”, e Managing Director di ABC Tours a indica.
El a agrega cu ta importante pa menciona cu mirando tur e cambionan cu nan ta bay ta haciendo, mirando e foutnan cu a haci den pasado, a bin cu protocolnan pa por contraresta e preocupacionnan cu ta biba den comunidad.

Medidanan di siguridad mas preciso
Kelly a sigui bisa cu ABC Tours ta consciente cu e tour operators ta hayando algun feedback negativo, pero ta tumando un direccion diferente cu medidanan di siguridad.
Pa menciona algun, ABC Tours tin su ‘Safety Briefing Room’ unda ta conscientisa e cliente ariba e importancia pa yuda cuida Aruba y unda ta duna e cliente consehonan ariba siguridad como tambe ariba proteccion di Aruba su medio ambiente.
Tin un protocol nobo tambe caminda a introduci un ‘Safety Officer’ pa educa y conscientisa.
Adicionalmente e velocidad maximo di e jeeps y UTV’s a keda reinforsa pa garantisa comportacion durante ‘off-road’ por ehempel na Parke Nacional Arikok cu maximo di 20 km/h, den comparacion cu 50 km/h, cual ta un average cu tur tour operators ta core.

Atencion na medio ambiente y naturalesa
Marvin Kelly a laga sa cu teniendo cuenta cu e shoconan y su neishinan, cual ta un símbolo nacional, pariba di Lighthouse, e ‘UTV Tours route’ a wordo adapta pa no core mas den e direccion aki.
ABC Tours a manda algun recomendacion na Gobierno y AHATA relaciona cu cambionan cu ta na bienestar di Aruba y ta gradici nan e atencion brinda.
Den un otro articulo lo elabora ariba e cambionan den e maneho cu ta wordo implementa pa por hiba un operacion mas responsabel, respetando naturalesa, medio ambiente y e comunidad particularmente.

Comments

comments