Analisis: Na Aruba so cosnan asina ta socede! Mundo ta den crisis, Aruba ta den crisis. 4.6 miyon persona a haya e corona virus y 311 mil persona a fayece caba. Na Aruba 101 persona a test positivo, di cual 3 persona a fayece.
Ademas, e corona virus a impacta economia mundialmente severamente y Aruba ta un di e paisnan mas seriamente afecta economicamente. Esaki tin consecuencia financiero hopi serio pa pais Aruba.
Ta obvio cu e gran mayoria di ciudadano di nos pais ta consciente di esaki, cu excepcion di tres lider sindical.
SIMAR, SPA, SEPPA tin lidernan cu sea ta aplica politica di avestrus of realmente ta sirbi un otro agenda, un agenda politico di oposicion.
E tres lidernan sindical ta purba di bringa e decision di Gobierno pa corta salario di empleadonan publico. Nan a entrega un carta na VNO, representacion di Hulanda na Aruba, cu a backfire. Pasobra e carta di sindicatonan SIMAR, SPA, SEPPA a cay den masha mal tera mes na Hulanda.
Expresionnan manera: “zijn deze mensen wel goed bij?”, “beseffen deze mensen wel dat in het verleden verkregen rechten tot het verleden behoren?”, “realiseren deze vakbonden dat het nooit meer business-as-usual zal zijn?”
Hulanda a perde e tiki respet cu e tabata tin pa e sindicatonan y a aumenta e iritacion ayanan pa cu e empleado publico di Aruba.
Y kico Hulanda a haci? Manda un medida mas contra tur empleado publico: awor ta perde derecho riba indexering.
Si sindicatonan a djis keda keto, realisa cu tin un crisis mundial, acepta cu tur hende mester sacrifica awor, nan lo a scapa tur ambtenaar e extra medida aki.
Riba dje awor SIMAR ta manda un carta totalmente politico, cu a cay den peor tera na Hulanda.
SIMAR, SPA, SEPPA realisa cu boso ta perhudicando tur empleado publico. Boso ta na tempo ainda, sali na defensa di bo miembronan y yuda Gobierno di Aruba den su esfuersonan sobre humano pa mantene e empleadonan publico na trabou, cu e posibilidad di haci carera manera cu boso conoce awor, cu por cierto ta hopi lucrativo compara cu sector priva. Mas boso protesta, mas rabia boso ta lanta na otro banda di oceano, y mas bo ta perhudicando bo propio miembronan.