SOUTH CAROLINA, Merca- Un grupo di studiantenan di un universidad di South Carolina y residentenan local tabata baila y bula den un discoteca den un apartemento diasabra anochi. Na e momentnan ey, Jeremy Tester a sinti algo straño bou di su pianan.
“Bo casi por a skucha e piso ta habri, algo asina”, el a bisa, “pero niun hende no a pensa cu esey lo sosode. Nan simplemente sigui fiesta”.
Pero diriepiente, e piso a bin abao. Decenas di persona a precipita den caida liber y a cay riba un masa di curpanan gespart den e sotano.
Polis a bisa cu mas o menos 30 persona a resulta herida ora cu e piso di e apartamento a colapse durante un fiesta durante e fin di siman, festehando e ‘Back to School’ na Clemson, South Carolina.
Niun persona a keda atrapa durante e colapso y niun hende a sufri heridaann cu lo por a pone nan bida den peliger, hefe di polis di Clemson, Jimmy Dixon a bisa na WYFF, afiliado di CNN.
Un total di 30 persona a wordo manda pa hospital cu wesonan kibra y cortanan.
“Nos ta gradici cu e no tabata pio di loke e tabata ta”, Dixon a bisa.
Un video di e escena ta mustra e piso habriendo mescos cu un pelicula di teror. E escena di alegria y celebracion rapidamenta a transforma den grito y caos.
E incidente a tuma luga apenas algun minuut despues di mei anochi den e cas di e compleho di apartment Woodlands of Clemson, Tal Slan, presidente di Woodlands Property Management a bisa.
E compleho di apartamento ta na casi 5 km noordoost di Clemson University. E edificio di e clubhouse cu a cay aden ta un area comun den e compleho, construi na 2004, Slann a bisa.
Polsi a informa di cu e caso ta bou investigacion.
Fiesta di Fraternidad di Kappa Alpha Psi
Clemson University a bisa cu e evento tabata un evento anual di ‘homecoming weekend’, patrocina pa e fraternidad Kappa Alpha Psi cual a wordo atendi tanto pa studiante como no studiantenan. Den un comunicado diadomingo, e universidad a bisa di ta investigando e studiantenan envolvi y pa notifica otro institucionnan di cual nan studiantenan a atende e fiesta.
Piso a move mescos un trampolin
Jaylen Adams a bisa di cu el a sinti e vloer subi y baha mescos cu’n trampoline, mientras e personanan tabata move riba ritmo di e musica. E; a bisa su amigonan pa nan bay na e balcon, pero e vloer a kibra prome cu nan por a bay djeynan.