Recientemente a divulga varios imagen di e atake di un tribon riba un mucha cu a sosode dia 15 di januari ultimo durante un actividad acuatico den un hotel na Bahamas.
Como parti di un programa denomina “Walking with Sharks” p’e huespednan di e hotel Atlantis Bahamas Resort, e menor a drenta den un tanki cu tribon di rif compaña pa varios persona, tur ekipa cu un tipo di helm di glas y un tanki di oxigeno.
Memey di e experiencia, un di e depredadornan a pasa entre e pianan di e mucha y a haci cu esaki a perde balans. Segun e website TMZ, e animal a probecha e vulnerabilidad di e mucha y a mord’e na un pia, cerca di su bil, haciendo cu esaki a sangra.
Riba e imagennan di e incidente, revela diasabra p’e medio, por a mira basta sanger den awa y e mucha landando p’e superficie prome cu a wordo rescata pa su tata, kende a bula na awa y a yud’e sali. E testigonan a sigura cu despues e homber a sali coriendo pa busca atencion medico cu su yiu den brasa.
Polis di Bahamas a informa di e caso riba e dia ey, indicando cu e victima a wordo hiba un hospital. E dia siguiente a reporta cu e mucha tabata un ciudadano Mericano fo’i Maryland y cu tabata den condicion stabiel. Sinembargo no a ofrece detaye riba e alcance di e victimanan of e motibo di e reaccion di e tribon.
E atraccion a wordo cera for di e momento ey mientras cu e investigacion ta transcuri y e resort reevalua su procedemento riba esaki.
