Diabierna atardi, Aruba su dos tri-atletanan Giannon Eights y Renze Postma a sali pa Republica Dominicana unda diadomingo awor ambos lo competi den un evento grandi di triathlon na e pais di merengue. E hoben Giannon Eights cu recientemente a drecha un record personal den triathlon lo competi den e Centro Americano y del Caribe categoria hubenil unda e lo hasi e distancia di Supersprint. Di otro banda, Renze Postma lo competi den e ITU Premium Cup, e distancia di Sprint. Mester bisa cu varios pais lo bay ta presente na e competencia aki. Ya caba a confirma Brasil, Merca, Guatemala, Colombia, Francia, Venezuela, Aruba y Republica Dominicana.
Mester bisa cu tanto Renze y Giannon sin duda ta dos di e miho tri-atletanan masculino cu Aruba tin actualmente. Luna pasa, e hoben Giannon Eights a duna un bon prestacion den e Weganan Suramericano Hubenil Santiago 2017 y awor ta preparando su mes pa e clasificacion pa e Weganan Olimpico Hubenil 2018 di Buenos Aires, Argentina. Pa loke ta e tri-atleta elite Renze Postma, e ta competi den tur e eventonan di CAMTRI den nos region y continente y ta forma parti di e Development Team di ITU. Como coach ta Republica Dominicana lo fungi Lucien Dirksz.
Un danki na Lotto, e loteria di Aruba cu pa medio di Comision di Subdidio a subsidia e biahe di e atleta Giannon Eights pa e Centro Americano y del Caribe di triathlon na Republica Dominicana.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.