Diahuebs den oranan di marduga a sosode un delito na San Nicolas cu laga dos homber malamente maltrata, door di cuatro hoben y riba dje a bay cu casi 2000 florin for di nan. Recherchenan tin e caso bou di investigacion.
Segun por a compronde for di polis, e hecho aki a tuma luga casi den careda di 1.30 di marduga den Bernhardstraat, y e victimanan a pidi asistencia di polis despues cu e agresornan a laga nan mal bati riba caya. Esaki tabata casi un ora despues di e sucedido.
E Polisnan mes a banda di Vanco Hardware Store riba Pastoor Hendrikstraat unda, segun e yamada, ta topa cu e dos hombernan atraca. Pero tabata den Bernhardstraat cu e patruya a wordo para door di dos homber.
A constata mesora cu e homber di inicial I., tabatin su cara completamente hincha y tur na sanger. Mas despues a constata cu e tabatin corta (kap) na banda robes riba s cabes.
El a bisa cu e tabata hunto cu un amigo y cu tabata tres mucha homber a atraca nan. E problema a cuminsa ora cu nan a haya flattire banda di Citgo, unda a para e auto y busca forma pa cambia e tire. Na e momento ey dos mucha homber desconoci pa nan a yega cerca. Un di nan tabatin un jack y a ofrece nan ayudo. Pero e mucha homber tabatin e jack na su cas. “Pa 20 dollar mi por hiba boso cas,” e hoben a bis’e.
Nan a subi den auto cu e mucha hombernan y un di nan a bis’e cu su nomber ta V., y cu prome cu nan bay e mester pasa busca su primo. Pero ora cu a yega e cas, e mucha hombernan a saca nan for di e auto y a cuminsa maltrata nan. Un di e mucha hombernan tabatin un cuchiu den su poder y e otro a dal’e cu un piedra riba su cabes.
For di I., nan a bay cu 300 dollar cash cu e tabatin cu ne. E otro victima, di inicial G., a conta e mesun version. Polisnan a constata cu su boca y frenta tabata hincha. E ta papia di cuatro hoben cu a maltrata nan.
E auto den cual a bay cu nan tabata un Suzuki Swift. G. a declara tambe cu e no sa nomber di e caya. Si e ta corda cu banda di un imagen di Mama Maria, nan a tuma un caminda di santo na banda drechi. Eynan e hoben a para e auto y e otro hoben a baha. Su cara e no por a mira pasobra continuamente e tabata lomba p’e. Despues e hoben V. A reverse e auto, bay banda drechi pa despues sigui direccion nort te ora cu nan a yega na un muraya grandi blanco.
E mucha hombernan a baha nan for di auto y a cuminsa maltrata nan. Nan a bay cu su cartera cu 1400 florin, su bancomatico di Aruba Bank y CMB, y tambe su celular. Nan a cana straight te na final pa busca ayudo di polis.
E patruya a pidi presencia di ambulance mirando cu nan tabata basta maltrata y a hiba nan auto pa Warda di Polis San Nicolas.