E situacion di COVID ta preocupante na Aruba. No pa e COVID mes sino pa e efecto cu esaki tin pa cuido medico y e falta di atencion cu otro pashentnan no por haya debi na e situacion aki.
Awe den oranan di merdia tabatin un situacion preocupante. Dado momento tabatin mester di ambulance pa transporte un persona cu tabata malo. Sinembargo no tabatin ambulance disponibel. Segun por a compronde, riba cada shift ta uza tres vehiculo di ambulance. Pa mala suerte di e persona cu a bira malo, a causa di e calor inmenso cu ta azota Aruba, a resulta cu no tabatin ambulance disponibel pa transporte pa dr. Horacio Oduber Hospital.
Segun por a compronde di informacionnan ricibi, tur tres ambulance na e momentonan ey tabata atende cu pashentnan di COVID cu mester transporta pa hospital.
E tabata un situacion hopi dificil pa familiarnan, un impotencia di no por haci nada mirando e pashent despues di a sufri un ataca y no tin ambulance pa busc’e.
Tin tres persona infecta cu COVID cu a wordo transporta pa Colombia, poniendo mas presion riba gastonan di cuido. E motibo ta cu HOH di Aruba ta chikito y no tin e capacidad pa atende cu esnan cu mester di ayudo specialisa, den cuido intensivo. Banda di pashentnan di COVID, tin otro pashentnan cu tambe mester wordo interna den ICU. E seccion aki ta cuadra cu loke Aruba lo mester normalmente, sin un pandemia di COVID.
E aumento di pashentnan di COVID interna den hospital, ta pone presion pa motibo cu pa cada pashent den ICU mester tin cierto cantidad di personal specialisa y esaki Aruba no tin na e momentonan aki.
No solamente e ola nobo aki di COVID ta trece cu ne cu debi na e cantidad di personanan interna den hospital, pashentnan cu mester haya otro servicio di hospital, no por haya esaki pasobra tur hende nan atencion ta riba esnan di COVID. Expertonan ta bisa cu e ta keda un circulo vicioso, unda esnan mas afecta ta e pashentnan di malesanan no-Covid.
Cifranan di DVG ta mustra cu Hospital tin (te diadomingo) 23 persona interna di cual 4 ta den ICU, 18 riba piso general y 1 riba piso di maternidad. Datos di hospital ta ilustra cu di esnan ingresa den hospital cu COVID, 21 persona no tin ningun vacuna y solamente 2 persona ta vacuna, esnan interna den ICU ningun ta vacuna. Por mira cu mayoria ta personanan cu no a wordo vacuna. Ora di pandemia, Aruba tabatin capacidad pa 15 te cu 17 persona den ICU, pero mayoria di e personal a bay caba for di Aruba, ora cu e cantidad di casonan a baha.
Expertonan a bisa MasNoticia cu e ta cuestion cu e pueblo mester protege su mes, vacuna y si no ta vacuna, tuma medidanan di precaucion. Si no haci nada di esaki, e situacion di esaki ta e resultado cu ta mira awendia.