Benjamin Romero, periodista y autor di dos buki; E Caya di Monchi y Negoshi di Koffie na Aruba a duna un tremendo charla hunto cu linguista Ramon Todd Dandere tocante e diferente tema interesante di nos historia y cultura, cual a tuma lugar diasabra ultimo 19 di December na Coffee Break na final di caya.
A probecha di e temporada di pasco pa haci un charla y combersatorio na Coffee Break tocante e obra Caya di Monche y riba e negoshi di koffie y su historia riba nos isla. E ta fundamental pa sigui promove literatura na papiamento segun sr. Romero, “mi ta contento cu e aña aki, apesar di e pandemia, tabata tin cierto produccion y cosecha literario [20 obra literario] cu a wordo publica e aña aki apesar di e reto cu e situacion actual di e pandemia ta trece cu ne.”
Esaki ta un bon señal segun sr. Romero cu hende ta sigui sostene literatura na Papiamento y cu tambe tin un motivacion pa sigui skirbi riba historia, poesia y mas na Papiamento den cuadro cu su desaroyo y fortalesa di e idioma. Interesante ta cu esaki ta obra skirbi na Papiamento, cual sigur pa nos pueblo ta intersante pa nos busca manera di co’I e custumber di lesa tocante nos mes, y generalmente pa nos lesa.
E obra Caya di Monche ta trata parti di sr. Ramon Todd Dandere su bida, pero sigur un parti hopi interesante di historia di Aruba mes. E negoshi di koffie na Aruba tambe ta conta un parti di e historia comercial di nos isla, con comercio grandi den añanan 40,50, 60 a inicia cual tabata negoshi cu no t’ey mas pero tabata brinda hopi empleo antes durante e temporadanan menciona.
“Si nos kier siña di nos propio historia, tocante ken nos ta y con nos a bin na unda nos ta awe, nos mester lesa. Anto e dos obranan aki ta trece esakinan pa dilanti, uno riba e parti social y e otro riba e parti comercial,” segun sr. Dandere.
Akinan por mira e charla completo cu a wordo transmiti Live riba Facebook tambe via pagina di e autor [E charla su audio ta cuminsa despues di 3 minuut di e grabacion]