Segun presidente di Parlamento, drs. Mervin Wyatt-Ras, tratamento di presupuesto 2017 di pais Aruba ta prioridad no. 1 den e simannan venidero.
E presupuesto a drenta Parlamento na tempo e aña aki cu ta e fecha 1 di September. A duna Parlamentarionan un luna y mey di tempo pa lesa y prepara pa asina a entrega preguntanan encuanto e ley importante aki dia 18 di October cu a pasa. Gobierno ta trahando ariba contestanan y asina cu nan cla lo pone e presupuesto ariba agenda pa ser trata den reunion publico. Wyatt-Ras ta trece padilanti cu den e siman cu a pasa miembronan di Parlamento tabatin espacio pa nan reunion den diferente comisionnan. Wyatt-Ras mes a reuni tambe den comision di Asuntonan Domestico tocante diferente asuntonan di importancia pa funcionamento di Parlamento. E ta spera cu gobiero por keda cla cu e contestanan pa mas pronto cu ta posibel por cuminsa cu e tratamento den reunion publico. E Presidente lo consulta alabes cu lidernan di fraccion encuanto e procedura pa trata e presupuesto.