Diabierna a tuma luga den Corte di Prome Instancia, e caso contra di D.A., M.P., L.R.S., A.C.P. A.V.Z., kendenan ta sospechosonan den e atraco ariba Hulpbestuurskantoor na Savaneta y tambe di e joyeria Little Europe. E caso a keda trata den forma di Pro Forma.
D.A. ta wordo acusa tanto den e caso di atraco ariba Hulpbestuurskantoor Savaneta y tambe di a tira atraco ariba un joyeria. Segun su abogado, den e caso di atraco di joyeria, ainda nan no a haya e stukkennan pa e por prepara su defensa y no por bisa cu si falta ainda pa investiga.
Hues a bisa cu door cu ta trata di un caso hopi grandi y mirando e seriedad di e caso, e ta propone pa trata tur dos caso separa. Pa loke ta trata e atraco ariba joyeria, D.A. su caso lo wordo trata dia 27 di November pa 9 or di mainta. Pero A. lo mester presenta den corte tambe pa asina trata su caso di atraco ariba Hulpbestuurskantoor. Esey lo tuma luga dia 28 y 29 di November 2017.
Pa loke ta trata e acusadonan M.P., L.R.S., A.C.P. y A.V.Z., nan ta wordo sospecha di a comete e atraco ariba Hulpbestuurskantoor Savaneta, hunto cu e acusado D.A. E caso aki di e atraco ariba Hulpbestuurskantoor Savaneta lo wordo trata den Corte dia 27, 28 y 29 di November 2017.