Den e ultimo dianan mi a tuma nota di un noticia cu pa fin di October di e aña aki, lo tin un ferry ta nabegando entre Venezuela y Aruba.
Informacion cu si gobierno (lesa: diferente minister) si of no ta al tanto di e servicio aki, ta hopi bruha, pasobra di un banda (alg)un ta bisa di no sa di nada, pero di otro banda Solo di Pueblo riba pagina 5 di su edicion di diahuebs, 8 di September 2016, ta divulga cu ta ya for di 2012 un acuerdo pa un servicio di ferry a ser firma cu gobierno Venezolano door di minister Timmermans di Hulanda, prome minister Hodge di Corsou, y Mike Eman himself!
Pero, prome cu e noticia di e ferry aki di e compania “Naviera Paraguana” a sali, ya caba tabatin combersacionnan andando encuanto un otro servicio di ferry, pero na unda Venezuela NO tabata inclui den e ruta(nan).
Lagando un banda cu si e otro colega-ministernan tabata sa of no di e convenio y di e rutanan di e compania Venezolano, e pregunta ta si nos – Aruba – mester di dos servicio di ferry.
Prome cu contesta e pregunta ey, mester ta cla kico e rutanan di e ferry(nan) lo ta, pues entre cua wafnan di cua paisnan e ferrynan lo bay nabega.
Pa loke ta trata e ferry di e compania Venezolano, manera mi a comprende, e intencion lo ta pa cuminsa cu e ruta Paraguana/Aruba vice versa, pa despues wak si expansion di servicio pa inclui Corsou y Boneiro ta (comercialmente) factibel. Den otro palabra, Aruba lo bira e coneu di prueba (proefkonijn) pa e compania.
Pa loke ta trata e impacto cu e ferry aki lo tin riba nos trafico, lo siguiente ; bo no por “verwacht” nada otro cu Aruba lo wordo invadi cu “turistanan” Venezolano, mayoria di kende lo bin cu nan propio vehiculo, pero na mesun momento cu nan propio comportacion den trafico, manera nan ta custumbra na Venezuela. Y si bo a yega di participa den trafico na Venezuela, lo bo sa kico mi kiermen.
Nos ciudadanonan procedente di Venezuela, cu ya caba a haci di Aruba nan segundo hogar, ya conoce y ya a adapta nan mes na nos trafico y su reglanan; pues miedo di topa esakinan riba nos careteranan, eigenlijk bo no mester tin, aunke aki aya lo bo kier toch recorda algun di nan cu ta na Aruba nan ta!
Ademas di e turistanan aki, lo bo haya esunnan cu kier scapa di e situacion pesimo na Venezuela, y cu lo kier uza e ferry pa busca un mihor biba aki na Aruba. Humanamente lo bo mester por comprendenan: ta hende nan tambe ta! Pero, di otro banda, pa nos mesun Arubianonan, “original” y “importá”, ya bida ta hopi duro, y di berdad “ya no hay cama pa’ mas gente!”
E intencion en principio di e otro servicio di ferry, manera mi por a comprende, ta pa conecta Aruba, Corsou y Boneiro. Venezuela NO tabata “in the picture”.
Ta mas cu claro cu den un set-up di un ferry, bo NO ta bay “over één nacht ijs”. Cada destino mester por sigura y garantisa, cu – si por ehempel nan bisa cu e tempo cu ta tuma entre yegada y desembarcacion di tanto pasahero como vehiculo y carga, ta tuma por ehempel 2 ora – ta maximo 2 ora e TA tuma!
Sin e garantia ey, e proyecto ta “gedoemd tot falen”, e proyecto ta cay na awa!!
P’esey tambe hopi preparacion ainda ta tumando lugar entre e tres islanan pa sigura cu e operacion na tur tres destino bay mas “smooth” posibel.
P’esey tambe mi tin tur comprendimento pa e hecho cu e ferry aki no a cuminsa nabega ainda.
Si e operadornan despues di tempo kier hunga cu e idea pa inclui Venezuela den e ruta di e ferry aki, mi no ta verwacht nada otro cu – specialmente y sigur pa e ruta aki – nan lo bin cu reglanan estricto pa tanto transporte di pasahero como di carga y vehiculonan.
Pa locual mi sa di e servicio entre Aruba, Corsou y Boneiro, compara cu esun entre Venezuela y Aruba, mi mester duna esun prome mas chens di exito y sobrevivencia; e seriedad cu cua e preparacionnan ta tumando lugar casi ta dunabo un garantia pa esaki.
Remigio A. R. Wever, 42.10.01.44
Ex – director A.T.A.
Fundador/ex-director Cruise Tourism Authority