AIB Bank N.V. ta contento di por anuncia cu diasabra dia 25 di Mei a logra conclui exitosamente un transaccion pa cu (re)financiamento di e prestigioso propiedad Hilton Aruba Caribbean Resort & Casino cu e grupo di accionista encabeza pa Aruba Growth Fund representa pa Srs. Rene Kan, Justus Martens y Milton Berlinski. E transaccion di cual tres institucion financiero a forma parti aden ta pa un suma di Afl. 182.5 miyon florin su equivalente na US dollar, a wordo lidera pa AIB BANK N.V. den su rol como Mandated Lead Arranger, financiador y Agente.
AIB BANK N.V. sigur ta gradici pa e confianza y ta orguyoso di por agrega Hilton Aruba Caribbean Resort & Casino na su portafolio mirando su excelente contribucion na nos industria hotelero y turismo en general. Pa e banconan local, esaki ta un transaccion historico y importante di cual nos ta sumamente orguyoso di por forma parti di esaki.
Sigur cu AIB BANK N.V. ta gradici e instituto-nan financiero, Stichting Algemeen Pensioenfonds (APFA) y Aruba Bank cu a forma parti di e consorcio aki pa cu e logro aki y kier felicitanan tambe pa cu e conclusion exitoso di e refinanciamento aki. Tambe, AIB BANK N.V. ta gradici tur esnan cu a asisti den e proceso aki incluyendo Brown Lawyers como consehero legal di e grupo, Notaris Johnson, y Van Eps Kunneman Van Doorne Lawyers como deal counsel cu a apoya e tarea inmenso aki di e internal legal counsel y e team interno di Corporate Finance di AIB BANK N.V. Sin duda tur partido involvi ta orguyoso di por contribui na e futuro di e hotel icónico aki, cu ta celebrando su di 60 aniversario.