Durante un conferencia di prensa, vocero di Servicio di Impuesto Meverly Romano ta splica cu den tur pais tin e posibilidad pa un persona eherce un profesion independientemente. Na Aruba tambe tin hopi persona cu ta haci e escogencia di traha riba nan mes y ultimamente, hopi persona cu tawata den servicio di un empleador a perde nan trabou. Como cu costo di bida ta sigui, e personanan aki ta busca manera pa lora man y ta bay funciona independientemente.
E personanan cu ta funciona independientemente ta genera otro tipo di entrada cu locual no ta wordo yama salario mas. E personanan aki ta genera un entrada abase di un trabou independiente. Pa locual ta trata belasting specificamente inkomstenbelasting, e personanan aki lo mester paga e inkomstenbelasting riba e entrada cu nan ta ricibi. “Nos ley di inkomstenbelasting tin diferente fuente di entrada y un di e fuente nan aki ta labor. E fuente di entrada cu yama labor por wordo parti den tres categoria: entrada di un empleo actual (salario), entrada di un empleo di pasado (pensionado) y trabou independiente (side job)” Romano ta splica. Personanan cu ta traha independiente mester tene un administracion simpel di tur locual nan ta ricibi durante e aña. Na final di aña y despues ora cu nan ricibi nan aangifte di inkomstenbelasting, nan tin e total di e entrada di full e aña. E personanan aki tin e derecho tambe pa declara y deduci un parti e gastonan cu tawata relaciona directamente na por genera e entrada. Na final di aña ora cu tin e cuenta saca, e personanan aki por wak cuanto realmente e la gana durante e aña ey. E belasting cu e personanan aki mester paga ta kitando e gastonan relaciona cu e entrada aki. Por declara tur gasto na pregunta nuebe di e aangifte. Segun Romano, e parti di administracion ta hopi importante pa mantene y pa e motibo aki tambe ta recomenda warda tur recibo.