Trahadornan di Elmar ta rabia y por bin accion, ta pone compania y gobierno responsabel

Ayera atardi bestuur di sindicato Alvast a wordo invita pa un reunion urgente yama door di Utilities y raad van commissarissen hunto cu director di NV Elmar. Informacion cu nos a ricibi for di Raymond Maduro, presidente di Alvast, ta indica cu gobierno como doño di Utilities a instrui gerencia di compania NV Elmar pa informa e sindicato cu ta representa e empleadonan cu pa loke ta 2021 y te cu nadere orde mester renoba e protocol.

Directiva di Alvast a splica e board cu miembronan a bay di acuerdo pa entrega na un manera boluntario desde Mei 2020 te cu fin di December 2020, a acorda pa entrega un suma di salario y bonus pa por a yega na 12.6% pidi door di gobierno. E condicion bao cual por a yega na un areglo mutuo, e placa reteni lo keda den compania NV Elmar, pa asina yuda e compania su situacion financiero. Mirando cu hotelnan y comercio su consumo a baha drasticamente, y e retraso di clientenan cu ta tarda lunanan largo prome cu nan cumpli cu nan obligacionnan di bin paga.

Mirando cu tin un protocol firma entre Alvast y gerencia cu ta termina 31 December 2020, y mirando cu gobierno kier obliga trahadornan pa sigui ta solidario y accepta protocol nobo, trahadonan di NV Elmar a rechasa y vota contra pa sigui retene 12.6%. Nan ta di opinion cu si gobierno kier pas’e tog, anto pas’e via un ley of landsbesluit unda e ta conta pa tur instancia y companianan, y pa tur hende cu si ta genera placa. E ultimo update cu e sindicato tin ta cu gerencia di Elmar a haya opdracht di Utilities y gobierno cu pa tene e 12.6% aden como ‘inhouding’ sin cu e trahado of sindicato a bay di acuerdo cu ne.

Trahadonan na Elmar ta masha disgusta y rabia cu esaki y no ta descarta cu lo por bin un accion y ta pone e compania y gobierno responsabel pa tur loke por bay pasa.

Comments

comments