Masnoticia a tene un entrevista cu Sra. Gina Maduro presidente di sindicato di trahadonan di hospital despues cu esakinan a sali pafor un biaha mas pa demostra nan malcontento. Sr. Maduro a declara cu e e trahadonan a sali pafo no pa manifesta sino mas bien pa tuma parti na un reunion informativo di e ultimo desaroyonan pa loke ta e negociacionnan di nan contrato colectivo. Mester menciona cu akinan ta trata di un CAO gigantesco ya cu e mester bai beneficia mas di 1300 persona pasobra ta e diferente departamentonan di hospital e CAO aki ta bai ta aplicabel. Sra. Maduro a sigui bisa cu e tabata un negociacion di mas cu 20 luna cu a cuminza exactamente 15 di Maart 2018 y Diahuebs 21 di November 2019 a logra sera esaki. Mester bisa cu e negociacionnan si a sera den forma exitoso pa ambos partido esta gerencia di Hospital y su trahadonan. Loke a sosode ta cu constamente e trahadonan tabata wordo yama pa haya informacion riba e desaroyonan di e negociacionnan di CAO pero awemainta e reunion aki cu e trahadonan tabata un oficial cu tur cos a caba exitosamente. A logra bai acoord cu e CAO y Diamars awo dia 26 di November lo firma esaki p’asina e bira finalmente oficial. Sra. Maduro a bisa cu unanimamente e puntonan pa cu e CAO nobo aki a keda acorda y ambos partido a keda contento. Mirando esaki despues di tur e problemanan cu trahadonan di hospital ta confronta tur dia na pia di trabao debi na hopi factor structural, e CAO aki ta trece cierto trankilidad bao di e trahadonan cu apesar di tur cos nan pan di cada dia ta sigura na Hospital. Sra. Maduro a bisa cu e ta kere cu aña 2019 ta y tabata un aña hopi pisa, e hecho di e acuerdo pa un CAO nobo ta pone cu e trahadonan den cierto forma por traha trankil bek aunke cu pa varios dia no tin problemanan grandi den e parti structural rondo di e construccionnan, toch un ora pa otro algo por sosode y esaki a sosode tambe mirando e caso di hacking cu a sosode recientemente. “Pero mester wak e parti positivo pasobra e team ta mas uni, nan ta mas hunto, nos ta campeon y mi ta kere cu no tin organizacion na mundo cu por evacua mas miho cu nos”, asina Sra. Gina Maduro a declara.