Trahadonan ta matando mangrovenan di Mangel Halto

Un ciudadano di Pos Chikito ta hopi preocupa cu e forma con ta mantene e area di Mangel Halto limpi. En bes di yuda, e ta sinti cu ta causa daño y e mangelnan ta muriendo.

E ciudadano Ryan a splica cu ta haci e luga limpi, pero ta prop e blachinan den e reisnan di e mangrovenan, cu ta stroba circulacion di awa. “Poco poco e mangrovenan na Mangel Halto ta muriendo. Hopi aña atras tabatin un movecion di awa cu ta crea un bista bunita. Pero awo tur e sushinan cu ta hark, cu plastic y boter ta den e mangelnan tira,” e ciudadano a comenta.

El a splica cu e blachinan mester keda na suela, pa duna bida na tur loke ta e parti lama. Ta papia cu ta traha compost, pero esaki no ta e caso. Patras di Mangel Halto un tempo tabatin un canal y a construi un brug. Bou dje tabatin circulacion di awa. Pero pa motibonan desconoci, esaki ta completamente tapa mientras cu e brug t’ey ainda. “E canal ey mester wordo habri pa haya circulacion drentando banda drechi y pasa sali na banda robes. Eynan e blachi mes ta bira parti di naturalesa. Ora nivel di awa subi, e ta drenta den tur e matanan. Tirando sushi, ta crea un altura artificial y e nivel di awa no ta yega na e matanan.”

E area ey ta conoci pa su mangrovenan y loke ta pasando awo, ta cabando cu e situacion. E ta un atraccion turistico. Y no ta solamente Mangel Halto, pasobra henter e area bay ariba tin mangrovenan y por nota riba henter e ruta, con ta tira e sushi den e mangrovenan direccion di Pos Chiquito pa Savaneta. Tin area caba cu a bay perde. Unabes cu e area ta seco, ta pasobra no tin fluho di awa.

 

 

Comments

comments