Tin un preocupacion na Riu. E trahadonan di Food & Beverage di Riu Palace, pa basta tempo caba a mustra nan duda den e pago cu nan ta ricibi di Service Charge. FTA a atende esaki cu gerencia y a bisa nan cu si e trahadonan tin duda, tin cu laga un control tuma luga y a busca un compania independiente pa haci e control, segun e presidente di e sindicato, Hubert Dirksz.
Mientras cu ta den e proceso pa haci control, pa e trahadonan aproba pa haya cu e trabao ta wordo haci, tin un tardansa. E trahadonan ta haya cu e tardansa aki no ta na su luga. Compania tin basta tempo ta laga e control keda alarga, sin cu e ta tuma luga.
E ultimo informacion cu a haya, despues cu a reuni luna pasa, cu na comienso di November, un di e hefenan grandi for di Spaña lo bin pa duna informacion cu e accountannan di Aruba ta pidiendo. E ora FTA a laga sa cu si tin hopi tempo ta atendiendo cu esaki, e trahadonan ta mal contento y tin duda, dicon tin cu tarda asina hopi.
E Spaño por bin dentro di dos dia pa Aruba of haci un reunion via skype, por ehempel. Dirksz ta compronde cu por tin motibonan pa un luna, pero compronde tambe situacion di e trahadonan. Compania ta bisa cu no tin nada for di luga, cu tin mas trahado y e temporada di September, ta temporada abao y esey ta haci cu e Service Charge ta abao. Por bisa tur loke cu kier, pero si e trahado tin un duda, tin cu dun’e espacio pa e control tuma luga, segun Dirksz Y eynan e cos ta. Awo cu e trahadonan a dicidi pa protesta, tin un intimidacion di parti di paden for di Gerencia. Un grupo a sali pafo, e ora ey e trahadonan aki cu a keda paden y esunnan cu a sali, ta wordo intimida.
Ta increibel cu bo ta haya ex lidernan sindical ta comporta di manera cu nan ta intimida. A yega momento pa e trahadonan para y pa haya mas respet di dunadonan di trabao. Na mesa, ta purba di yega na tur solucion. Pero si e dunadonan di trabao ta kere di intimida trahado y pa asina sigui haci loke nan ta kere cu ta bon pa nan haci, sin tene cuenta cu e trahado, nan ta bon kiboca.
Esaki no ta un welga, sino un protesta di un ora, pa e trahadonan mustra nan mal contento. Esaki ta pasa na hopi compania, cu ora e trahadonan protesta, loke ta pasa ta cu gerencia ta bin cu camara pa saca cada un trahado pa intimida nan. Esaki ta trece confrontacion. E ta un provocacion y e mensahe aki a bisa e manager, cu asina ey no ta traha. Si e trahado tin un duda y ta mal contento, e tin derecho pa expresa su mes. E no mester wordo intimida di e forma eynan.
Riba social media tin hopi comentario cu e trahadonan ta wordo mal trata door di gerencia. Segun Dirksz, nan no ta haya tur informacion di loke ta pasa. Tin trahado no ta duna informacion pasobra e tin miedo. Bibando cu miedo asina, no por sigui y ta spera cu departamento di labor ta haci mas control y cu Gobierno, e minister encarga ta autorisa y ta forsa pa e control tuma luga. Si tin violacion di ley, sancionnan ta wordo duna, pero ta ki dia e cos aki lo pasa, Dios so lo sa, segun Hubert Dirksz.
Si e trahadonan aki bay paden, e medidanan di intimidacion of cualkier otro medida ta wordo tuma contra nan, segun Dirksz, mester por actua mas duro y para e cosnan aki. Trahadonan mester pone mas presion y tur mester sali pafo pasobra asina aki no por traha. Como partner di e comunidad aki, cu ta depende di turismo, pa bay dilanti conhuntamente, intimidacion asina no por continua, segun Dirksz.