Diabierna mainta trahadonan cu ta reparti carta di Post Aruba NV, a tene un reunion informativo cu sindicato SEPPA. Segun Edmundo Marlin, SEPPA a wordo yama diabierna mainta door di e trahadonan debi na un mal contento cu a pasa ayera, diahuebs. Banda di esey tabata tin mas cos cu ta preocupa e trahadonan y a yama e sindicato awe mainta y nan a presenta pa scucha e preocupacion di e trahadonan di loke a pasa.
Un trahado ayera a wordo geschors, pero sin haya e documento, pues no sa ni cuanto dia el a wordo suspendi. Esey ta un procedura cu no ta cuadra. Si suspende un hende ta suppose di bisa pa e duracion di e investigacion, pa tanto dia ta bay tene e empleado suspendi, si ta tres, cinco of dies dia.
Pero banda di esey e trahadonan tin hopi keho di locual ta sosodiendo na post entre otro falta uniform, no tin bon comunicacion entre hefe y trahadonan. E forma con HR nobo ta trata nan. Nan tin hopi keho y pesey SEPPA a bin scucha nan y SEPPA a compila e informacion, ta bay pone por escrito y lo bay mand’e pa director di post pa tene un reunion cun’e y pa wak con por atende e problemanan aki y bin cu solucion mas lihe posibel. Pasobra e trahadonan ta demotiva awor aki di loke ta pasando. E situacion aki ta birando mas pio diariamente. Pesey SEPPA a haya ta importante pa tene reunion cu e trahadonan pa por scucha nan. Cos no ta canando bon na Post Aruba NV.
Segun Marlin, pa loke ta e empleado suspendi, tin un investigacion cu Post ta bay haci. Algo a sosode y Post tin cu haci su investigacion. Loke a mustra Post, caminda cu el a faya cu no por manda un hende cu sospension cas, sin e persona haya por escrito cuanto dia exactamente e lo wordo suspendi. A manda bise cu el a wordo suspendi y cu lo wordo yama. Awor e persona ta pendiente ki dia lo bay yame. E cos aki no ta klop ni cuadra. Na momento e persona ta wordo suspendi, e mester sa cuanto dia lo wordo suspendi.
Fuera di esey e problemanan interno cu tin na Post, a bira hopi. Trahadonan ta hopi mal contento y nan ta dispuesto pa haci tur cos, pero cierto momento SEPPA ta mustra nan cu tin cu cana e caminda corector awor aki. Tin cu scucha, pone cosnan riba papel, manda carta pa leiding, sinta na mesa y trata e asunto aki pa wak con por soluciona e problemanan.