Trahadonan di Google rond mundo a protesta diahuebs pa e manera di actua di e compania relaciona cu casonan di acoso sexual, despues di a bira conoci cu e gigante tecnologico a proteha e creado di Android, Andy Rubin, despues di un demanda.
Segun informenan di EFE, e informacion a conduci na convocatarionan di welga di oficinananan cu e compania tin den diferente continente.
E prome protestanan a tuma luga den e oficinanan Asiatico di Google, manera esun di Singapore y Tokio, y a sigui den ciudadnan Europeo manera London, Berlin y Zurich.
E organisadornan a haci un yamado na welga den cada un di e sedenan di e compania, pa cual ta spera cu e protestanan sigui den transcurso di dia na Merca.
The New York Times a reseña, basa riba documento y entrevistanan cu mas di tres decena di ehecutivo y empleadonan, Google a proteha Rubin despues di a wordo acusa di un conducta sexual inapropia cu a wordo considera “creibel” den un investigacion interno.
E compania, ademas, a compensa su salida di e compania na 2014 cu 90 miyon dollar, segun e corant a informa.
Despues di e scandal aki causa door di e publicacion, e consehero di Google, Sundar Pichai, a sigura cu e compania a kita 48 persona for di trabao pa conductanan sexual inapropia den e ultimo dos añanan.
Den un email na su empleadonan, na cual medionan local tabata tin acceso, Pichai a defende cu di e casi 50 empleadonan, 13 tabata personanan cu “cargo halto” y a indica cu “niun di nan a ricibi un compensacion despues di a wordo kita for di trabao.
Ora cu Rubin a bandona Google na october 2014, e firma cu sede na California no haci publico e hecho cu’n empleado femenino a acus’e di practica sexo oral den un hotel un aña prome, segun dos ehecutivo conocedo di e asunto, cita pa The New York Times.