Trahadonan di Felipe Construction awor cu miho condicion laboral

E siman aki Sindicato FTA, den representacion di e empleadonan di Felipe Construction & Consultancy N.V. (FCC) a firma un contracto colectivo di trabou cu ta cubri aña 2019-2020 den cual nan tur ta bay dilanti. Pa FTA a firma Hubert Dirksz y mr. Hose Figaroa, mientras cu pa e compania a firma su Director, Omar Tromp. Despues di e firmamento ambos partido a bisa di a keda satisfecho cu e acuerdo. E negosacion  a dura algun luna pero tabata satisfactorio.

Empleadonan a conoce un aumento di un promedio di 5% riba nan salario, y a drecha e beneficionan secundario. Den esey mester pensa riba un miho seguro pa accidente, miho seguro di bida, otro beneficionan adicional y, a regla nan bonus di fin di aña awor den e contracto colectivo.

Felipe Construction & Consultancy ta existi desde aña 1987 y ta conta awendia cu 75 empleado. Nan ta bon conoci pa realisa trabounan grandi na WEB Aruba NV.. Ey nan ta responsabel pa proyectonan manera trabounan di mantencion henter aña riba e planta di awa SWRO, riba e boilernan, Recips y maneho di facilidadnan. Separa di trabounan na WEB Aruba NV., empleadonan di FCC ta ehecuta varios proyecto importante na Aeropuerto, specialmente rond di e trabounan di renobacion continuo.

Gerencia di Felipe Construction & Consultancy N.V. a yama e sindicato FTA bon bini den nan compania y a expresa di ta spera di por tin un bon relacion cu nan pa tempo largo, cu respet mutuo y semper teniendo interes di e trahadonan banda di crecemento y desaroyo di e compania na mente. Di e forma aki tanto e compania mes como e trahadonan ta crece hunto den e proceso.

Comments

comments