Tin 2 miyon cu a wordo transferi pa SABA pa e por paga e trahadonan cu tin varios aña wardando, pero e placa a wordo uza pa otro cos.
E mandatario encarga cu Salud, Sr. Dangui Oduber a cuminsa na splica cu e trahadonan di SABA tin varios aña ta wardando ariba un pago y esaki tin varios aña den discusion entre gobierno y SABA. E ta un fundacion cu gobierno no tin niun representacion den e Hunta di Supervision, mientras cu gobierno ta subsidia SABA cu 23 miyon florin. Y tur esaki a cuminsa algun aña pasa ora cu gobierno di gabinete Eman II, basa ariba un peticion di e bestuur di SABA, pa gobierno traspasa un suma di placa pa bay over na pago di rechtrekking di trahadonan. Ora cu e gobierno actual a asumi mando, nan a reuni cu e sindicatonan cu ta representa trahadonan di SEPPA y ABV. Ambos sindicato a trece e preocupacion dilanti di e trahadonan. Tambe gobierno a scucha varios trahado di kico ta e situacion na e momentonan aki na SABA, como tambe cu e dirigentenan y e hunta di supervision di SABA, hunto cu Directie Financien, SEBOS y Directie Volksgezondheid pa haya e informacion necesario, pa mira con ta bay resolve e problema cu tin.
A bin resulta cu en berdad un suma di placa a wordo traspasa pa SABA, pero e no a cumpli cu e pago di e trahadonan. Recientemente gobierno a bolbe tene un reunion cu tur e partidonan envolvi y a invita e sindicatonan cu tin representacion den SABA como tambe algun trahado pa ta presenta den cuadro di transparencia, brinda tur informacion disponibel pa tur hende ta na altura di e situacion. E placa a wordo traspasa y SABA no a cumpli cu e pago cu ta coresponde na e trahadonan. A dicidi siman pasa cu tur partidonan (SABA, Directie Financien, SEBOS y Directie Volksgezondheid y DRH) lo sinta na mesa e siman aki pa asina trece claridad na e trahadonan ki dia nan ta bay wordo paga. SABA no a uza e placa pa e proposito pa cual e mester a wordo uza.
SABA a uza e placa aki pa otro proposito. Aparentemente, SABA tin un reserva cu segun nan, nan mester mantene e reserva aki, pa gastonan imprevisto. SABA tin e placa disponibel pa cumpli cu e pago pa cu e trahadonan. Y p’esey a yama e reunion entre tur e partidonan pa nan sinta na mesa, pa wak cuanto placa tin reserva den e fondo di reserva di SABA y si e placa aki por wordo uza pa e trahadonan. A yega e momento pa SABA cumpli cu e trahadonan, cu tin mas di 10 aña caba t wardando. Ta trahadonan ta duna di nan parti pa cuida nos grandinan, cu merece e miho trato y servicio cu nos pais por duna nan. Ta tempo pa tin un decision final, segun e mandatario, ki dia e pago lo cuminsa wordo traspasa pa tur esunnan cu ta wardando ariba esaki pa varios aña caba.
Gobierno a pone como meta final pa no mas tarda cu 27 di maart tin un decision final di kico lo bay pasa y ki dia e trahadonan ta bay wordo paga, segun Sr. Dangui Oduber, minister encarga cu Salud.