E situacion na Dutch Village, ta e comienso di varios accion cu sindicato STA lo tene na diferente hotel cu nan ta representa. Sr. Diego de Cuba ta amplia.
Ta di lamenta cu trahadonan di Housekeeping ta wordo maltrata pa gerencia di e hotel. E situacion ta hopi alarmante y ta lamenta cu nada ta wordo haci di parti di gerencia. Apesar cu a tene varios reunion cu nan.
E trabao di housekeeping ta wordo forsa pa haci un penthouse limpi, mancandonan fisicamente y sikicamente tambe nan ta wordo gebully, door di e hefe grandi. E cosnan aki STA no ta soporta nan mas, y ta denuncia e caso aki publicamente. Gobierno tambe mester pone atencion riba kico ta pasando, y vooral minister di Labor cumpli pa loke a wordo priminti pa su carera como minister di Labor. EL a priminti di bin cu un ARBO wet pero nunca mas a bin cu esey. Tin hendenan di edad grandi cu ta haciendo e trabaonan aki, pero nan ta wordo abusa. Pero mas abuso ainda cu e compania aki ta trece den servicio sub- contractor cu hendenan cu ta haya menos camber pa haci limpi, pero cu mas salario.
Tin hende ta trahando na Dutch Village ya cu mas di 20 aña y ainda nan no por yega 2 mil florin pa luna. Esaki ta un sistema di sclabitud moderno, bou di un capa. Y esaki STA ta denuncia publicamente. Nan no ta mantene nan mes cu un vacation planner pa e trahadonan. E trahadonan ta sufri di persecusion personal. Hopi di e trahadonan tin miedo di welga, pasobra nan tin miedo di represalia. Y esunnan cu si a welga, ta paso cu nan a sacudi e miedo caba for di nan curpa.
Beneficio cu e trahadonan aki tabata gosa di dje, tur a disparce. Pero e trabao si a bira mas hopi y kico esaki ta causa? Ta matanan fisicamente. Di parti di STA nan not a bay acepta e cos aki no mas. P’esey a bin cu un accion di protesta y esaki ta e prome, no na Dutch Village so. Lo bay tin mas hotelnan caminda trahadonan lo bay demostra na malcontento
Mester trece un cambio den e situacion aki. E fenomeno di sub contractor a lanta cabes. Mester elimina e uitzendbureaunan, pero gobierno no kier duna oido na e cosnan aki. Ora cu un persona bay pidi prestamo, nan ta wordo nenga. mester pone un fin na e era aki, y duna e trahadonan loke nan merece. Tin espacio pa mehora nan salario. Si tin pa e sub contractor, tin pa e trahadonan vast tambe.
Aunke a reuni varios biaha cu gerencia, toch por ripara cu e fiesta ta sigui. Loke nan ta haciendo ta un mental harrasment, pasobra ora ta zundra un trahado, esey ta causa daño psicologico. Aparte di esaki, fisicamente, locual e hendenan aki ta haci, esey ta casi imposibel.
Segun Sr. de Cuba, si sindicato no sali pa e trahadonan, niun hende no ta sali pa nan. Hopi hende ainda ta biba den e cultura di miedo, pero mester sacudi esaki for di bo curpa, pasobra bo tambe tin derecho! Esaki segun Sr. Diego de Cuba, di Sindicato STA.