Diabierna 5 di Mei pa 5 or y 50 di atardi, Centrale Post ta manda un patruya di San Nicolas pa De Palm Island, pa un caso di robo. Agentenan policial a subi e boto pa bay atende e caso aki. E partidonan envolvi ainda tabata ariba e luga.
Na e sitio e agentenan policial a wordo atendi cu e manager na warda na De Palm Island, P., kend ea declara cu e compania Verizon a organisa un evento ariba De Palm Island caminda cu varios articulo a wordo duna na e turistanan como regalo. Al parecer un di e trahadonan di De Palm Island lo a horta e articulonan aki. Un di e personalnan di siguridad a wak e trahado, J.B., pone un saco di sushi banda di e pier. Un rato despues durante un checkeo haci den e saco di sushi, nan a bin encontra algun di e articulonan di Verizon. E manager a confronta B. cu e hecho aki y a puntr’e si e por a controla su tas. B. a bay di acuerdo cu esaki. Akinan nan a bin haya mas articulo di Verizon cu a disparce.
E trahado a keda den oficina sperando ariba polis. Patruya a tuma e denuncia di e señora S. Harper, cu tabata e lider di e evenemento y tambe a tuma declaracion di P. E trahado J.B. a wordo deteni y hiba warda di Santa Cruz, unda cu e lo wordo acusa formalmente.
Central di Polis a wordo informa di esaki.