Un otro aspecto ta cu ta haya un persona cu cierto permiso original, pero ta trahando na un otro luga cu no ta para ariba su permiso. Esaki no por, ya cu segun di LTU, e mester ta trahando na e luga cu ta para riba su permiso. Un persona cu permiso di “inwonende dienstbode” no por ta trahando como bartender.
Pa ley, e persona no ta wordo deporta di biaha. Pero si ta wak cuanto tempo e persona tin su vergunning, tin yen di rekisito. Pero conforme e maneho, ta considera cu e persona tin x cantidad di tempo trahando caba corectamente, sin problema, e persona por bay, pero e tin un prohibicion di traha na un otro luga cu no ta esun cu el a haya permiso pe. Sra. Trudy Hassel ta amplia mas ariba esaki.
Den caso asina, e persona mes ta hinca su curpa den un situacion caminda cu e Guarda Nos Costa ta hay’e obliga di bay cu e persona aki pa control. Basicamente e ley ta papia claramente cu e permiso ta pa cierto caminda y pa cana cu e permiso legal y original.
Pa loke ta trata e carnet, eynan tambe ta haya algun falsifica. Y den casonan asina, e bonnan tin cu paga pa e malonan cu ta purba pa daña e asunto, pero Guarda Nos Costa ta controla e carnet tambe si e ta bon of no.
Por ultimo, Sra. Hassel a bisa cu Guarda Nos Costa no a traha e ley, pero nan tin cu cumpli cu e ley. Nan ta personanan cu pa ley, tin e autorisacion di pidi un permiso na e persona, pa control. Si e persona no tin original, pero e copia, e ora Guarda Nos Costa ta bay cu e persona, pa asina bay check si e copia ta veridico. Tambe pa esunnan cu nan permiso ta bay vence, pa corda renoba esaki al menos 3 luna prome. Si no, tin chens cu e persona por wordo deporta, pero esaki ta depende di hopi factor, segun Sra. Trudy Hassel, di Migracion Aruba.