Diasabra, autoridad di Brasil a informa di e incidente tragico caminda cu un lamper a mata un hende muhe y a laga shete hende herida, entre an famia di e victima, riba un beach den e estado di Sao Paulo memey di awasero fuerte cu a golpia e parti zuidoost di e pais.
Di acuerdo cu loke Defensa Civil di e estado di Sao Paulo a informa “tabatin secuencia di descarga electrico entre e awa y santo riba e beach Vila Caiçara, Playa Grande, resultando den cuater victima, tur di e mesun famia.”
“Un di nan, un señora di 60 aña, a fayece; e otronan ta den estado grave, pero stabiel,” e entidad a añadi.
Autoridad a indica cu otro cuater persona a wordo alcansa p’e descarta electrico sin gravedad.
Den e estado di Sao Paulo, tres persona a muri den e ultimo 24 oranan despues cu awasero fuerte y biento a causa derumbe y inundacion den por lo menos seis municipio, e estatal Agencia Brasil a informa.
E awasero fuerte den e pais a cobra varios bida den e ultimo simannan, manera t’e caso di un homber cu a muri ora e vehiculo den cual e tabata biaha cu un otro ocupante, a wordo lastra pa awa den e ciudad di Sorocaba.
Na Limeira, dos hende muhe a wordo rescata despues di a keda atrapa bao di un auto, pero nan no a sobrevivi.
Den e estado Rio Grande do Sul (sur), un mal tempo diamars a laga dos morto, e gobernador Eduardo Leite a informa diasabra riba e red social X, ora cu el a actualisa e balans di victima.
Siman pasa, tempo malo di awasero y biento a asota e ciudad di Sao Paulo, cu un saldo di dos fayecido y miles di habitante di e mayor metropoli di Latino America a cubri den menos di tres dia cu corte electrico.
E region zuid di Brasil a enfrenta e ultimo lunanan evento climatico extremo, manera awasero fuerte y un devastador ciclon na september, cu a laga mas di 50 morto. Segun e expertonan, e fenomenonan aki, pusha p’e cambio climatico, tin e tendencia pa ripiti.