Minister di Husticia mr. drs. Arthur Dowers a compaña colonia Mericano diadomingo ultimo den e ceremonia pa recorda 15 aniversario di e atake terorista na New York, unda cu miles di persona a perde nan bida.
E tabata un ceremonia specialmente pa honra e sobreviviente, boluntario y Bomberonan kendenan tabata e heroenan den e tragedia aki cu a cambia bida di practicamente tur ciudadano na mundo. Manera a wordo bisa den un di e discurso, e tragedia aki ta e motibo cu awendia pasaheronan mester kita nan sapato pa control na aeropuertonan di mundo.
E mandatario a cuminsa pa pidi aplauso pa Cliff Faltman, kende ta e celebro tras di organisacion di e evento aki cu a tuma luga na e Monumento di Anne Frank riba Parke Wilhelmina. Sigur niun hende na mundo por lubida e fecha di 11 di September, 2001. “Ami ta corda unda mi tabata para riba 11 di September 2001. Cu excepcion di esnan di 15 aña of menos, no tin hende cu no ta corda e fecha aki. E tabata un momento den historia cu realmente a cambia e forma cu nos ta mira mundo moderno, y el a cambia hopi no solamente den siguridad, pero tambe na control na frontera.”
Minister Dowers a señala den forma diario hopi organisacion ta ocupa nan mes pa mantene tur hende na mundo sigur, un tarea dificil. Pero tambe como Minister di Husticia, el a bisa, encarga cu Bombero y Polis, ta mantene un forma di cooperacion cu organisacionnan rond mundo y ta consciente di con dificil e tarea di siguridad a bira despues di 9/11. “Loke a pasa riba 9/11 a trece hopi tristesa na mundo, specialmente na Merca. Pero tambe el a trece cos bon tambe. El a trece hendenan bon hunto y a uni entidadnan pa yuda haci e mundo aki uno mas miho y sigur. Mi ta kere cu nos tin un chief cu cada ciudadano por bay cas mainta y bolbe bek sigur anochi …. Nos ta spera cu tur hende cu a wordo afecta door di 9/11 ta consciente cu rond mundo tin hopi hende cu amor y pensamento ria e victimanan y nan famia. Nos ta kere cu esaki ta inspiracion pa esnan cu mester sigui den e ramo aki y esnan cu ta bini den futuro pa sigui haci loke e heroenan a haci riba e fecha di 9/11,”Minister Dowers a duna di conoce y a pidi un aplauso tambe pa e Bombero- y Polisnan di Aruba.