Sr. Michael Vrolijk ta e proyecto Manager nobo pa Green Corridor, y ta tuma e trabao over di colega Jossy Kock, cu awo ta traha den Departamento di Mantencion di Camindanan. E ta splica mas over di e proyecto Green Corridor.
E trabaonan di Green Corridor ta avansando hopi rapido ultimo temponan y pa esaki lo mester haci algun desviacion den trafico entre Oranjestad y San Nicolas pa e trabaonan por sigui. Actualmente lo cuminsa cu e crusada di Mahuma, unda tur e trafico ta bay wordo desvia ariba e parti nobo di e rotonde cu a wordo traha. Pa asina e resto di e rotonde por wordo finalisa.
Acerca di esaki tambe, e parti cu e caminda cu ta bay pa Santa Marta lo wordo habri parcialmente, esaki kiermen e trafico di San Nicolas por lora bay direccion Santa Marta y e trafico for di Santa Marta por bay solamente pa Oranjestad. Esaki ta pa preveni stagnacion den trafico den oranan druk, segun Sr. Vrolijk.
Sr. Vrolijk a sigui splica cu trafico cu ta biniendo for di Playa pa direccion Barcadera ta bay wordo desvia pa e caminda direccion Simeon Antonio, patras di Aeropuerto. Saliendo for di rotonde di Mahuma, e trafico lo bay pasa riba e caminda nobo cu a wordo traha pa e Green Corridor, bayendo direccion Seroe Tijsji.
Na Seroe Tijsi lo bay habri e rotonde pa trafico na unda esun yegando Seroe Tijsji e trafico ta wordo separa caminda e rotundo ta bay wordo uza completamente. En conexion cu esaki, lo habri e caminda for di Seroe Tijsji pa Barcadera, pa tur trafico. Despues e trafico lo sigui normalmente pa San Nicolas, manera cu e ta actualmente, segun Sr. Michael Vrolijk, Proyect Manager di Green Corridor.