Kenny Solognier, habitante di Matadera 22, ta cansa di e trucknan cu ta subi tereno priva di Matadera y benta nan sushinan eynan, cual no ta permiti.
Sr. Solognier tin 24 aña bibando na adres aki y e ta haya su mes ta enfrenta e personanan responsabel di e trabaonan ilegal aki y ta consumi diariamente cu tur e stof cu ta susha su cas. Sin menciona cu e personanan aki no ta mustra e habitante niun clase di respet. Sr. Solognier ta ta pidiendo ayudo desde hopi tempo caba y nada ta wordo haci. E ta mustra cu e buraco di sushi a crece durante añanan.
A pidi DOW pa pone un pida asfalt dilanti su cas, pero nan a bisa Sr. Solognier cu nan mester haci’e full e caminda. E ta tira un tiki zeta ariba e caminda, por poco e ta wordo deteni pasobra loke el a haci ta algo ilegal.
Eybanda tin un buraco, cu por bisa ta dump ilegal, tambe nan ta saca grijs. Sr. Solognier a bisa di no tin nada contra di e personanan aki, ya cu cada ken mester gana nan pan di cada dia. Ultimo temponan e ta haya invasion di boa y djakanan. Mas sushi tin, mas djaka e ta haya.
El a yama polis varios biaha, pero nunca nan ta yega. Pero si e dia yega cu Sr. Solognier kier tuma ley den su man, e ora nan kier hib’e cera. Asina aki no por sigui.
Nada lo bay drecha, y Sr. Solognier den su 24 añanan nunca a wak un cambio. Ta varios biaha caba el a yama. Gobierno ta bin, gobierno ta bay, pero tur cos ta mescos.
Por ultimo, Sr. Solognier ta spera cu algo por wordo haci y pronto. E ta gasta placa pa drecha su cas, pero cuanto mas mester sigui wanta?