Trabounan di renobacion di edificio biblioteca San Nicolas ta cuminsa na februari 2017. Gerente di Biblioteca Nacional Aruba ta contento cu por informa publico cu e proyecto aki ta cerca awor. Pa tal motibo biblioteca lo tin cu muda pa un otro espacio. Despues di renobacion lo ofrece comunidad di San Nicolas un facilidad publico caminda un y tur ta bon bini y por yega pa lesa, studia, bishita exposicion y otro actividad informativo. Esaki cu un servicio optimal.
Mudamento ta cuminsa dialuna awor. Biblioteca lo drenta e edificio di ex-SINFA, situa na Zeppenfeldstraat # 10/11, pa algun luna. Aki bishitante lo por acudi pa cualkier informacion, prestamo di buki y otro servicio di biblioteca. Duracion di e proyecto aki ta calcula pa tuma 6 luna maximo.