Recientemente a cuminsa cu e trabaonan di mantencion ariba e brug di peaton di Pos Chikito. Sr. Marlon Croes di DOW ta splica.
E prome mita a wordo haci e siman tras di lomba, unda cu a cera e caminda di Oranjestad pa San Nicolas for di pariba di Rotonde, pa asina e trabaonan por sosode y asina no haci daño na e autonan. Awo ta toca turno na e segundo parti, caminda pa un siman atrobe, e caminda lo wordo cera, trafico lo wordo desvia.
Esey kiermen cu trafico biniendo San Nicolas for di Oranjestad, lo wordo desvia for di e caminda paralelo, y lo sali na e turbo rotonde di Pos Chikito y sigui pa Playa. E intencion ta pa cera despues di 9 or di mainta, despues di rush hour. Y lo sigui te cu 4 or di atardi, prome cu e rush hour di atardi pa e trafico su fluho por sigui.
E brug ta wordo manteni, treci bek den e estado manera cu e mester ta, pa cumpli cu tur e normanan. E trabaonan ariba e brug ta canando bon, pero tin hopi trabao ainda pa haci, segun Sr. Croes, di DOW. tur cos, lo mester keda cla pa 14 di Augustus proximo, dus e brug completo.
Sr. Croes a sigui splica cu e brug nobo lo no wordo uza pa peaton y e brug bieu unda cu te ainda ta core ariba dje, lo wordo asigna pa un parke, unda lo tin un fietspad, un zona peatonal, lo tin mata y naturalmente, e railingnan cu tin, lo wordo upgraded, treci nan normanan di awendia, cu ta garantisa e siguridad di e peaton.
Den tur proyecto grandi, tin sorpresa, pero door cu e proyecto aki, contrario na esunnan tradicional, a haci hopi preparacion intensivo pa por minimalisa tur e riesgonan. Naturalmente por minimalisa 95% di riesgonan y ainda ta keda e 5% cu por presenta na ora di trabao. Pero esaki a keda anticipa hunto cu CC Ondinsa ora cu a señala y a mitiganan na un estado trempan, pa e no sufri restraso, segun Sr. Marlon Croes, director di DOW.