Total di 33 persona a wordo deteni door di Jeugd en Zeden Politie den prome kwartaal di 2019
Cantidad di abusonan di menor ta alarmante y masha poco esakinan ta bin den prensa. For di mainta trempan nos di Masnoticia a purba haya e vocero di polis pa asina por tin un idea di estadistica di e cantidad di casonan di abusonan contra di mucha. A papia cu e vocero policial, Sr. Lito Lacle a mustra cu e no tin autorisacion pa duna esaki ainda mirando cu esaki no ta cla y na momento cu esaki ta cla, lo saca e informacion aki pa publico.
Masnoticia a sali busca e informacion aki mirando e cantidad di speculacionnan cu ta circula den media y tambe ariba rednan social.
For di Cuerpo Policial nos redaccion a ricibi e informe cu pa loke ta trata casonan di abuso di menor. Den e prome kwartaal di 2019, Jeugd en Zeden Politie, cu tin como tarea entre otro investiga casonan penal di sospechosonan bou di 18 aña y alabes casonan inmoral, a tuma .
e siguiente denuncianan pa cu casonan inmoral:
Keho di abuso sexual (victima di 16 aña of mas):
– 12 keho di abuso sexual
Casonan di inmoralidad (ontucht zaken)
– 19 caso (mucha bou di 12 aña art. 2:199 Wetboek van Strafrecht y mucha entre 12 cu 15 aña art. 2:200 wetboek van Strafrecht )
Na januari 2019, JZP a ricibi un total di 11 denuncia di cual 7 tabata di abuso sexual y 3 tabata ontucht (caso di inmoralidad contra un menor)
Na februari 2019, JZP a ricibi 9 denuncia di cual 3 tabata abuso sexual y 5 tabata ontucht (caso di inmoralidad contra un menor).
Na maart 2019, JZP a ricibi 9 denuncia di cual 1 tabata abuso sexual y 4 tabata ontucht (caso di inmoralidad contra un menor)
Na april 2019, JZP a ricibi 12 denuncia di cual 1 tabata abuso sexual y 7 tabata ontucht (caso di inmoralidad contra un menor).
En total, 33 sospechoso a wordo aresta y cu a bay den aresto preventivo.
Na e departamento di Jeugd en Zeden Politie tin 8 recherche trahando, di cual 3 ta certifica pa interoga ( Studioverhoor) mucha bou 12 aña.
Tur informacion ariba cada caso specifico ta keda na prerogativo di Ministerio Publico si e ta bay den detaye si of no.