PHILADELPHIA, Merca- Douane Mericano a intercepta den un di e terminalnan di e waf di Philadelphia un cargamento masivo di cocaina, cu segun e prome calculonan lo ta rond di 16.5 ton. E droga cu a keda confisa diamars, si el a subi caya, ariba mercado e lo tabata tin un balor di 1 biyon dollar. E ta e cargamento di droga mas grandi nunca antes intercepta den e region y un di esunnan mas grandi di e pais aki.
E cocaina tabata reparti den varios container, segun informacion di medionan local cu ta cita fuentenan cu a participa den e operativo. E cargamento cu a wordo transporta cu e barco Gayane, a haci varios stop na Colombia, Chile, Perú, Panama y Bahamas prome cu el a yega su destino na e costa oost di Merca. E barco ta nabega cu bandera di Libia. E agencia anti-droga d Merca (DEA) a aresta varios miembro di e tripulacion.
E investigacion ta andando, pero ta wordo specula cu e droga a wordo subi pa e personal di e barco den e awanan occidental dilanti e costanan Latinoamericano. Segun e prome declaracionnan di e miembronan di e barco, un total di 14 embarcacion a acerca MCS Gayane na dos ocasion durante e biahe, entre Chile y Panama. E compania doño di e barco ta cooperando cu autoridadnan.
E prome informenan ta indica cu e destino final di e cargamento tabata Hulanda y Francia, aunke no ta conoci si parti di e droga lo mester a wordo baha na Merca pa su distribucion. E interceptacion di e cargamento ilegal aki a tuma luga den e terminal situa na e riu Delaware, ciudad zuid di Philadelphia. Fiscal William McSwain a declara cu e cantidad di narcotico ta suficiente pa “mata mas di un miyon ” di persona.
DEA a adverti caba despues di e intercepcionnan record aki cu cocaina ta bek manera cu e tabata ta den añanan di e decada di 1990. E traficantenan, segun e agencia a splica, ta purbando di habri mercadonan nobo mesclando droga cu substancianan sintetico manera fentanyl cu ta 50 biaha mas potente cu heroína. Pa e motibo aki nan ta insisti ariba e importancia di coordinacion entre e varios agencianan.