Otro siman lo ta yegando Aruba mas di 120 hoben for di diferente pais den Reino pa asina participa na Torneo di Reino 2018 cu lo tuma luga dia 2 di october te cu 5 di october.
E torneo di Reino ta culminacion di un proyecto na diferente paisnan den Reino Hulandes, manera Aruba, Korsou, Boneiro, Sint Maarten y Hulanda unda cu pa un termino di 1 aña, a brinda miles di hobennan oportunidad di desaroya nan propio potencialnan sea den area de deporte of arte. Na e manera aki ta promove desaroyo posititivo y sano na futuro adultonan. E proyecto aki yama ‘Alleen jij bepaalt wie je bent’ y ta un iniciativa di Stichting Laureus, coordina cu Ministerio di Husticia di Hulanda.
Dialuna 1 di october ta yega Aruba un delegacion di 160 persona, consisti di 120 hoben cu lo ta participando na weganan di baseball y futbol.
E weganan lo ta durante henter e siman di 2 di october te cu 5 di october.
Apertura di Torneo di Reino lo ta 2 di october pa 4or di atardi na Compleho Deportivo Frans Figaroa.Diabierna 5 di october, pa 1’or di merdia lo tuma luga e wega final y tambe otorgamento di premionan cu lo tuma luga na Compleho Deportivo Frans Figaroa pa 4’or di atardi. Lo tin animacion di Buleria pa asina entretene tur hoben y publico.
Stichting Laureus, hunto cu ‘Alleen jij bepaalt wie je bent’ ta haci un invitacion na pueblo di Aruba pa bin presencia e apertura, weganan y clausura. Alabes ta pidi apoyo di nos comunidad pa presencia e weganan y hunto brinda un sosten na un manera participativo y demostra solidaridad pa cu desaroyo sano di nos hobennan cu ta futuro di nos pais y tur otro paisnan den Reino Hulandes.